Qazaqstanda 2030 jylǵa deıin 37 ótkizý pýnkti jańǵyrtylady
ASTANA. KAZINFORM — Elimizde memlekettik shekaradaǵy avtomobıl ótkizý pýnktterin jańǵyrtýdyń aýqymdy baǵdarlamasy bastaldy, dep habarlaıdy «QazAvtoJol» UK.
Halyqaralyq saýda, tranzıttik tasymaldar men jolaýshylar aǵynynyń ósýine baılanysty 2030 jylǵa deıin 37 shekaralyq nysandy kezeń-kezeńimen qaıta jańartý josparlanyp otyr.
— «QazAvtoJol» ulttyq kompanııasy Qazaqstan-Qyrǵyz jáne Qazaqstan-Reseı shekaralarynda alty basym jobany iske asyrýǵa kiristi (Besaǵash, Qarasý, Syrym, Álimbet, Jańa Jol jáne Qosaq ótkizý pýnktteri). Aldaǵy ýaqytta atqarylatyn taǵy alty joba pysyqtalyp jatyr. Olar: Tasqala, Úrlitóbe, Qurmanǵazy, Aqsaı, Qaıraq jáne Kamyshanovka, — delingen kompanııa taratqan aqparatta.
Ótkizý pýnktterin jańǵyrtý aıasynda kólikterdi ótkizý qabileti artyp, azamattar men saýda ókilderi úshin shekaradan qolaıly ári tez ótýge jaǵdaı jasalmaq. Sondaı-aq, baǵdarlama shekara mańynda ornalasqan aımaqtardyń damýyn yntalandyryp, respýblıkanyń halyqaralyq kólik dálizderine yqpaldasýyn kúsheıtedi.
Fotoda qazirgi qurylys jumystary jáne jańa eskızder kórsetilgen.
Buǵan deıin Memlekettik kirister komıteti «Tajen» ótkizý pýnkti 1 qyrkúıekke deıin ýaqytsha jabylatynyn habarlady.