Qazaqstanda 2029 jylǵa deıin 4,3 GVt jańa elektr qýaty iske qosylady
ASTANA. KAZINFORM – Qazaqstanda 2028-2029 jyldary jalpy qýaty 4,3 GVt bolatyn dástúrli elektr generatsııasy nysandaryn iske qosý josparlanyp otyr, dep habarlaıdy Energetıka mınıstrligi.
Vedomstvo elektr energetıkasyn damytýdyń uzaq merzimdi josparyn ázirledi. Qujatta jańa elektr óndirý qýattaryn kezeń-kezeńimen iske qosý kózdelgen.
Jospardyń negizgi maqsaty – eldiń energetıkalyq áleýetin arttyrý, elektr energııasyna ósip kele jatqan suranysty qamtamasyz etý, sondaı-aq dástúrli jáne jańartylatyn energetıkany qatar damytý.
Mınıstrliktiń málimetinshe, 2028 jyly 2 GVt dástúrli generatsııany iske qosý josparlanǵan.
Atap aıtqanda, Taraz, Atyraý jáne Aqtóbe qalalarynda bý-gaz qondyrǵylary salynady. Sondaı-aq Ekibastuz GRES-2 stantsııasynda №3 energobloktyń qurylysy kózdelgen.
Budan bólek, «Qaraǵandy Energotsentr» nysanynda qazandyq agregaty men týrboagregat salý, «Kazakhmys Energy» BTETs-inde jáne osy kompanııanyń jylý elektr ortalyǵynda qazandyqtar men týrboagregattar ornatý josparlanyp otyr.
Aqsý GRES-iniń energoblogyn keńeıtý jáne jańǵyrtý jumystary da osy kezeńde júzege asyrylmaq.
– Jospar energetıkalyq júıeniń qolda bar qýatyn arttyrýǵa, elektr energııasyna ósip kele jatqan suranysty qamtamasyz etýge, sondaı-aq dástúrli generatsııa men jańartylatyn energııa kózderin odan ári damytýǵa baǵyttalǵan, – delingen mınıstrlik habarlamasynda.
2029 jyly taǵy 2,3 GVt dástúrli generatsııany iske qosý josparlanǵan.
Osy kezeńde Óskemen jylý elektr ortalyǵynda týrboagregat pen qazandyq agregaty salynady. Atyraý JEO-da bes gaz-týrbınalyq qondyrǵy, al «Batys Paýer» JShS nysanynda eki gaz-týrbınalyq qondyrǵy iske qosylady.
Sonymen qatar Kókshetaý, Semeı jáne Óskemen qalalarynda jańa jylý elektr ortalyqtaryn salý, Ekibastuz GRES-3 stantsııasynyń birinshi energoblogyn paıdalanýǵa berý josparlanǵan.
Dástúrli energetıkamen qatar jańartylatyn energııa kózderin damytýǵa da basymdyq berilip otyr.
2028 jyly jalpy qýaty 2,2 GVt, al 2029 jyly 2,8 GVt bolatyn jańartylatyn energııa nysandaryn iske qosý kózdelgen.
Osylaısha, eki jylda dástúrli jáne jańartylatyn energııa kózderi esebinen jalpy 9,3 GVt jańa generatsııalaıtyn qýat engizý josparlanyp otyr.
Mınıstrliktiń boljamynsha, atalǵan jobalardy júzege asyrý nátıjesinde eldiń elektr óndirý qýaty edáýir artyp, 2029 jyly Qazaqstannyń energetıkalyq júıesi turaqty profıtsıtke shyǵýy tıis.
Aıta keteıik, buǵan deıin Ekibastuz GRES-2 stantsııasynda jańa energobloktardyń qurylysy bekitilgen kesteden keshigip jatqany habarlanǵan. Joba aıasynda úshinshi jáne tórtinshi energobloktardy iske qosý kózdelgen.
