Qazaqstanda 2029 jylǵa deıin 13,3 GVt jańa energııa qýaty iske qosylady
ASTANA. KAZINFORM — Qazaqstan aldaǵy úsh jylda energetıkalyq qýatyn aıtarlyqtaı arttyrýdy josparlap otyr. 2029 jyldyń sońyna deıin elde 13,3 GVt jańa generatsııalaý qýaty iske qosylmaq. Bul elektr energııasyna degen suranysty tolyq qamtamasyz etip, energetıkalyq júıede 20 paıyzdyq profıtsıt qalyptastyrýǵa múmkindik beredi. Bul másele Quryltaı depýtattary men energetıka salasynyń ókilderi qatysqan keńeıtilgen otyrysta talqylandy.
Astanada Quryltaıdyń Ekonomıkalyq saıasat, ónerkásip jáne energetıka komıtetiniń keńeıtilgen otyrysy ótti. Jıynda Prezıdenttiń «Jańa tarıhı kezeńdegi Qazaqstannyń ózekti mindetteri» atty Joldaýynda belgilengen energetıkany damytý jónindegi tapsyrmalardy júzege asyrý joldary qarastyryldy.
Otyrysqa Quryltaı Tóraǵasynyń orynbasary Danııa Espaeva, depýtattar, memlekettik organdar men otandyq energetıkalyq kásiporyndardyń ókilderi qatysty. Jıyndy komıtet tóraǵasy Natalıa Godýnova júrgizdi.
Danııa Espaeva Memleket basshysy energetıka salasyna el damýynyń negizgi baǵyttarynyń biri retinde erekshe mán bergenin atap ótti.
Onyń aıtýynsha, energetıkalyq resýrstarmen jetkilikti qamtamasyz etilý búginde memlekettiń básekege qabilettiligi men ekonomıkalyq derbestigin aıqyndaıtyn mańyzdy faktorǵa aınalǵan.
– Energetıka tutas ekonomıkanyń damýyna tikeleı yqpal etedi. Jańa zaýyttardy iske qosý, aýyl sharýashylyǵyn damytý, sondaı-aq jasandy ıntellekt júıeleri men derekterdi óńdeý ortalyqtarynyń jumys isteýi úshin elektr energııasy jetkilikti kólemde bolýy qajet, – dedi vıtse-spıker.
Sondaı-aq ol Prezıdent Joldaýynda 2029 jylǵa qaraı elektr energııasyn óndirý qýattarynyń turaqty profıtsıtin qamtamasyz etý, Balqash jáne Moıynqum atom elektr stantsııalaryn salý jobalaryn jedeldetý, otandyq mamandardy daıarlaý jáne tehnologııalar transferti sekildi naqty mindetter qoıylǵanyn eske saldy.
Qazaqstanda energetıkalyq qýat 13,3 GVt-qa artady
Komıtet tóraǵasy Natalıa Godýnova jańa elektr stantsııalaryn salý, qoldanystaǵy nysandar men elektr berý jelilerin jańǵyrtý, sondaı-aq elektr energııasyn óndirýdiń ártúrli baǵyttaryn damytý qajettigin atap ótti.
Onyń sózinshe, jasandy ıntellekt negizindegi tsıfrlyq ekonomıkany qalyptastyrý úshin elektr energııasynyń edáýir kólemi qajet. Al oǵan degen suranys aldaǵy jyldary turaqty túrde óse beredi.
Sondyqtan Qazaqstannyń aldaǵy bes, on jáne jıyrma jyldaǵy ekonomıkalyq damý áleýeti búgin qabyldanatyn energetıkalyq sheshimderge tikeleı baılanysty.
Energetıka mınıstri Erlan Aqkenjenovtiń málimetinshe, búginde Qazaqstannyń energetıkalyq júıesinde 254 energııa kózi jumys isteıdi. Onyń 172-si – jańartylatyn energııa kózderi nysandary.
Eldegi energııa kózderiniń jalpy belgilengen qýaty 27,1 GVt-ty quraıdy.
2029 jyldyń sońyna deıin taǵy 13,3 GVt jańa qýatty iske qosý josparlanyp otyr. Bul halyq pen ekonomıkanyń elektr energııasyna degen boljamdy qajettiligin qamtamasyz etip qana qoımaı, generatsııalaıtyn qýattardyń 20 paıyzdyq profıtsıtin qalyptastyrýǵa múmkindik beredi.
Balqash AES qurylysy 2027 jyly bastalýy múmkin
Atom energııasy jónindegi agenttik tóraǵasy Almasadam Sátqalıev Memleket basshysynyń tapsyrmalaryn oryndaý aıasynda ýrannyń memlekettik strategııalyq rezervin qurý josparlanyp otyrǵanyn aıtty.
Bul rezerv otandyq atom elektr stantsııalary men ıadrolyq otyn tsıkli salasyndaǵy perspektıvaly óndiristerdi shıkizatpen qamtamasyz etýge baǵyttalǵan.
Onyń málimetinshe, «Balqash» atom elektr stantsııasy jobasy boıynsha ınjenerlik-izdestirý jumystary aıaqtalýǵa jaqyn. Qajetti halyqaralyq kelisimderdiń barlyǵyna qol qoıylǵan.
AES qurylysyn 2027 jyly bastaý josparlanyp otyr.
Al «Moıynqum» atom elektr stantsııasyn salý aýdany anyqtalǵan. Qazir jobaǵa qatysty úkimetaralyq qujattardy ázirleý jumystary júrgizilip jatyr.
Energetıka salasyndaǵy ózge de jobalar talqylandy
Keńeıtilgen otyrysta iri energetıkalyq kompanııalardyń basshylary da baıandama jasady.
«Qazatomónerkásip» UAK» AQ basqarma tóraǵasy Meıirjan ıÝsýpov Qazaqstannyń atom energetıkasyndaǵy uzaq merzimdi qajettilikterin eskere otyryp, ýran ónerkásibi men ıadrolyq otyn tsıklin damytý máselelerine toqtaldy.
«Qazaqstan atom elektr stantsııalary» JShS bas dırektory Ernat Berdiǵulov AES salý jobalarynyń júzege asyrylý barysy týraly aqparat berdi.
Al «Samuryq-Energo» AQ basqarma tóraǵasy Ansar Aıdarov jańa generatsııalaıtyn qýattardy iske qosý josparlarymen bólisti. «KEGOC» AQ basqarma tóraǵasy Nábı Aıtjanov Qazaqstannyń biryńǵaı elektr energetıkalyq júıesin damytý máselelerin kóterdi.
Quryltaı depýtaty Bekjan Álimqulov energetıkalyq basymdyqtardy zańnamalyq turǵydan qamtamasyz etý máselesine nazar aýdardy.
Onyń aıtýynsha, qazir Quryltaıdyń qaraýynda energııa únemdeý men energııa tıimdiligin arttyrýǵa, sondaı-aq balamaly energııa kózderin damytýǵa baǵyttalǵan eki zań jobasy bar.
Depýtat bul baǵyttardyń birin-biri tolyqtyratynyn atap ótti. Energııa únemdeý resýrstardy tıimdi paıdalanýǵa múmkindik berse, balamaly energetıkany damytý energııamen jabdyqtaý múmkindikterin keńeıtip, energetıkalyq júıeniń ıkemdiligin arttyrady.
Talqylaý barysynda depýtattar energetıkalyq júıeni teńgerimdeý tetikteri, atom energetıkasynda shaǵyn modýldik reaktorlardy qoldaný perspektıvalary jáne elektr energııasyn jınaqtaý júıelerin engizý máseleleri boıynsha suraqtar qoıdy.
Sonymen qatar shaǵyn ónerkásiptik qalalardaǵy, sonyń ishinde Shahtınsk qalasyndaǵy jylý elektr ortalyqtaryn keńeıtý máselesi de qozǵaldy.
Energetıkalyq jobalardyń oryndalýy baqylaýda bolady
Otyrysty qorytyndylaǵan Natalıa Godýnova josparlanǵan sharalardyń is júzinde oryndalýyn qamtamasyz etý basty mindet ekenin aıtty.
Onyń sózinshe, árbir joba boıynsha naqty merzimder belgilenip, qarjylandyrý kózderi aıqyndalyp, jaýapty tulǵalar bekitilýi qajet.
Sondaı-aq jobalardyń oryndalýyn baqylaý kezinde nysandardyń naqty daıyndyǵyna, yqtımal kidiristerdi ýaqytyly anyqtaýǵa jáne olardyń sebepterin joıýǵa basymdyq berilýi tıis.
– Sonymen qatar zańnamalyq kedergilerdi joıý, zań aıasyndaǵy aktilerdiń qabyldanýyn jáne jańa normalardyń naqty qoldanylýyn qamtamasyz etý qajet. Qoldanystaǵy ókilettikter aıasynda sheshilýge tıis máseleler kidirissiz pysyqtalýy kerek. Komıtet osy mindetterdiń oryndalýyn baqylaýda ustaıdy. Túpkilikti nátıje aıqyn, ol – senimdi energııamen jabdyqtaý, jańa óndiris oryndary men jumys oryndary, – dep túıindedi komıtet tóraǵasy.
Aıta keteıik, 2027 jyldyń sońyna deıin AES-terdiń jeke qajettilikteri úshin ýrannyń memlekettik strategııalyq qory qalyptastyrylmaq. Bul týraly búgin Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
