Qazaqstanda 2029 jyldyń sońyna deıin 13,3 GVt jańa elektr qýaty iske qosylady
ASTANA.KAZINFORM – Qazaqstanda 2029 jyldyń sońyna deıin jalpy qýaty 13,3 GVt bolatyn jańa elektr energetıkasy nysandaryn iske qosý josparlanyp otyr. Bul týraly Úkimet otyrysynda QR Energetıka vıtse-mınıstri Baqytjan Іlııas málimdedi.
– Elimizdiń energetıkalyq qaýipsizdigin nyǵaıtý úshin jańa elektr stansalaryn salý josparlanǵan. Bul jumys ekonomıkanyń ósip kele jatqan suranysyn qamtamasyz etýge baǵyttalǵan. 2029 jyldyń sońyna deıin jalpy qýaty 13,3 gıgavatt bolatyn jańa nysandar iske qosylady. Onyń 7,4 gıgavaty dástúrli energııa stansalaryna tıesili. Al jańartylatyn energııa kózderiniń qýaty 5,9 gıgavatt bolady, – dedi ol.
Vıtse-mınıstrdiń aıtýynsha, bul jobalar elektr energııasyna degen suranysty tolyq qamtamasyz etýge múmkindik beredi. Nátıjesinde elektr qýatynyń kólemi qajettilikten 20 paıyz artyq bolady dep josparlanyp otyr.
Qazirgi ýaqytta Qazaqstanda 254 elektr energııasyn óndirý nysany jumys isteıdi. Onyń 172-si jańartylatyn energııa kózderine jatady. Elektr stansalarynyń jalpy qýaty 27,1 GVt bolsa, onyń ishinde kómir stansalarynyń qýaty 13,7 GVt, al jańartylatyn energııa kózderiniń qýaty 3,8 GVt bolady.
– Ótken jyly elimizde 123,1 mıllıard kılovatt-saǵat elektr energııasy óndirilse, tutyný kólemi 124,6 mıllıard kılovatt-saǵatqa jetti, – dedi ol.
Vıtse-mınıstr birqatar energetıkalyq jobanyń iske qosylý merzimi keshigip jatqanyn da atap ótti.
– Qýaty 544 megavatt bolatyn Almaty JEO-3 stansasyn jańǵyrtý jumystary keshigýde. Sondaı-aq Túrkistandaǵy qýaty 926 megavatt gaz elektr stansasy belgilengen merzimde tolyq iske qosylmaıdy. Atalǵan stansanyń 190 megavatt qýatyn ǵana iske qosý kózdelip otyr, – dedi ol.
Osyǵan baılanysty bıyl josparlanǵan 2,66 GVt qýattyń ornyna 1,27 GVt qýatty iske qosý josparlanǵan. Sonymen qatar bıyldan bastap elektr energııasynyń jeti jyldyq boljamdy balansy jańartylady. Bul rette iri ınvestıtsııalyq jobalardyń qajettiligi, onyń ishinde derekter ortalyqtary men jasandy ıntellekt ınfraqurylymynyń elektr energııasyna degen suranysy eskeriledi.
Baqytjan Іlııastiń málimetinshe, 2027 jyly jańa elektr stansalarynyń qýaty iske qosylǵannan keıin elektr energııasyn óndirý kólemi 134 mıllıard kılovatt-saǵatqa jetedi dep boljanyp otyr. Al tutyný kólemi 132,8 mıllıard kılovatt-saǵat bolady. Osylaısha, 1,3 mıllıard kılovatt-saǵat kóleminde elektr energııasynyń profıtsıti qalyptasýy múmkin.
– Bıyl toǵyz aıdyń qorytyndysy boıynsha jańartylatyn energııa kózderiniń elektr energııasyn óndirýdegi úlesi 8,5 paıyzǵa jetti. Sonymen qatar aýktsıon arqyly jańa jobalardy iske asyrý jalǵasyp jatyr. 2035 jyldyń sońyna deıin 8,4 gıgavatt jańa qýat kózderin qosý josparlanǵan. Onyń ishinde 1,8 gıgavaty kún elektr stansalaryna tıesili bolady, – dedi vıtse-mınıstr.
Budan bólek, Memleket basshysynyń tapsyrmasyna sáıkes, 2035 jylǵa deıingi elektr energetıkalyq balansty jańartý jumystary bastalǵan.
Energetıka salasyndaǵy taǵy bir mańyzdy baǵyt – kómir generatsııasyn damytý. Bul baǵytta jalpy qýaty 7,8 GVt bolatyn jańa qýattardy iske qosý josparlanǵan.
– Ulttyq jobaǵa 19 joba engizilgen. Onyń segizi jańa elektr stansalaryn salýǵa baǵyttalǵan, olardyń jalpy qýaty 5,3 gıgavat. Qalǵan 11 joba qoldanystaǵy stansalardy keńeıtý men jańǵyrtýdy kózdeıdi. Olardyń jalpy qýaty 2,5 gıgavatt bolady, – dep atap ótti ol.
Jobalar qatarynda Ekibastuz GRES-3, Kýrchatov qalasyndaǵy jylý elektr stansasy, sondaı-aq Kókshetaý, Semeı jáne Óskemen qalalarynda salynatyn jylý elektr stansalary bar.
Vıtse-mınıstrdiń aıtýynsha, ulttyq joba jańa stansalar salýmen qatar, qoldanystaǵy nysandardy jańǵyrtýdy da qamtıdy. Bul Qazaqstannyń energetıkalyq júıesin keshendi damytýǵa múmkindik beredi.
Aıta keteıik, Oljas Bektenov Prezıdent jarııalaǵan «Halyqtyq qurylys» jumyspen qamtýdyń ósýine jáne azamattardyń ál-aýqatynyń artýyna serpin beredi degen edi.
