Qazaqstanda 2028 jylǵa deıin iri kásiporyndardyń 60%-yna digital twins engiziledi
ASTANA. KAZINFORM – Qazaqstanda 2028 jylǵa deıin iri kásiporyndardyń keminde 60%-yna digital twins tehnologııasyn engizý josparlanyp otyr. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málimdedi.
Mınıstrdiń aıtýynsha, Digital Qazaqstan strategııasy aıasynda geologııa, ónerkásip jáne qurylys salalaryn tsıfrlandyrý boıynsha naqty kórsetkishter belgilengen.
– Ónerkásipte eńbek ónimdiliginiń jyl saıynǵy ósimin 7%-ǵa jetkizý, robottandyrýdy damytý, keminde 5 otandyq ıntegrator men 3 quzyret ortalyǵyn qurý mindeti qoıyldy. Qurylys salasynda jańa tehnıkalyq jaǵynan kúrdeli obektilerde BIM qoldanýdy kezeń-kezeńimen 100%-ǵa jetkizý josparlanyp otyr, – dedi Ersaıyn Naǵaspaev.
Onyń aıtýynsha, ónerkásiptegi tsıfrlandyrýdyń negizgi baǵyttarynyń biri – eńbek ónimdiligin arttyrý. Bul rette digital twins tehnologııasy mańyzdy qural retinde qoldanylyp keledi.
Qazir atalǵan tehnologııa baıytý fabrıkalarynda engizilip jatyr. Rýdadaǵy paıdaly komponentter mólsheriniń tómendeý problemasyn sheshý úshin datchıkter men machine vision tehnologııalaryn paıdalanatyn digital twins júıeleri qoldanylady.
Máselen, KAZ Minerals kompanııasynda engizilgen sheshim mys alý deńgeıin 2%-ǵa, al fabrıkanyń jalpy ónimdiligin 7%-ǵa arttyrýǵa múmkindik bergen.
Mınıstrdiń málimetinshe, geologııa salasyn tsıfrlandyrýdyń negizgi kezeńi de aıaqtalǵan. Geologııalyq aqparat tsıfrlyq formatqa kóshirilip, ashyq qoljetimdilikke shyǵaryldy.
Memlekettik qyzmetter biryńǵaı jer qoınaýyn paıdalaný portaly arqyly kórsetiledi. Aýktsıondardy tsıfrlyq formatqa kóshirý jáne geologııalyq aqparattyń qoljetimdiligin arttyrý nátıjesinde aýktsıondardan túsetin kiris 7 esege ósken.
– Endigi mindet – jasandy ıntellektini geologııalyq derekterdi taldaýǵa jáne perspektıvaly ýchaskelerdi anyqtaýǵa paıdalaný, – dedi mınıstr.
Sonymen qatar 2028 jylǵa deıin geologııalyq barlaýǵa tartylatyn jeke ınvestıtsııalar kólemin 30%-ǵa arttyrý josparlanyp otyr.
Aıta keteıik, Qazaqstanda energııa resýrstarynyń shyǵynyn 90%-ǵa qysqartý josparlanyp otyr.
