Qazaqstanda 2027 jylǵa deıin kvazımemlekettik kompanııalar qurýǵa tyıym salyndy
ASTANA. KAZINFORM – Elimizde kvazımemlekettik sektor sýbektilerin qurýǵa moratorıı engizildi.
Bul tyıym Prezıdenttiń ekonomıkany yryqtandyrý týraly Jarlyǵyna sáıkes engizilgen jáne 2026 jyldyń 31 jeltoqsanyna deıin jańa kompanııalar qurýǵa tyıym salýdy kózdeıdi.
Bul rette moratorıı eki jaǵdaıda qoldanylmaıdy:
«Zańsyz satyp alynǵan aktıvterdi memleketke qaıtarý týraly» zańdy qamtamasyz etý qajet bolǵanda;
Qazaqstan Respýblıkasy Prezıdentiniń tikeleı tapsyrmalary kezinde.
Moratorıı alǵash ret QR Prezıdenti Qasym-Jomart Toqaevtyń 2024 jylǵy 10 mamyrdaǵy «Ekonomıkany yryqtandyrý jónindegi sharalar týraly» Jarlyǵynda aıtyldy.
Kompanııalardy qurýǵa tyıym salý «Jeke kásipkerliktiń áleýetin tolyqqandy iske asyrý úshin ekonomıkalyq keńistikti bosatýǵa», sondaı-aq «básekelestik salalardaǵy memlekettik kásiporyndar sanynyń qaıta ósýine kedergi keltiretin normatıvtik jaǵdaılar týdyrýy kerek».
Buǵan deıin Ulttyq ekonomıka mınıstrligi tıisti zań jobasyn jarııalaǵan bolatyn.
