Qazaqstanda 2027 jyldan bastap avtojoldardyń ekologııalyq qaýipsizdigine biryńǵaı talap engiziledi
ASTANA. KAZINFORM – Qazaqstanda avtomobıl joldaryn jobalaý, salý jáne paıdalaný kezinde ekologııalyq qaýipsizdikti qamtamasyz etetin biryńǵaı vedomstvolyq normatıv qoldanysqa engiziledi. Qujatty 2026 jyldyń sońyna deıin bekitip, 2027 jylǵy 1 qańtardan bastap kúshine engizý josparlanyp otyr, dep habarlaıdy Kólik mınıstrligi.
QazjolǴZI ázirlep jatqan normatıv avtomobıl joldarynyń búkil ómirlik tsıkline – jobalaýdan bastap paıdalaný kezeńine deıingi barlyq protsesterge ortaq ekologııalyq talaptardy belgileıdi.
– Qujatta topyraqtyń qunarly qabatyn saqtaý, jerústi jáne jerasty sýlarynyń qorǵalýyn qamtamasyz etý, shań men zııandy shyǵaryndylardy azaıtý, shý deńgeıin tómendetý, óndiristik jáne turmystyq qaldyqtardy tıimdi basqarý, sondaı-aq qurylys aıaqtalǵannan keıin búlingen aýmaqtardy qalpyna keltirý talaptary kózdelgen, – delingen ınstıtýt habarlamasynda.
Mamandardyń aıtýynsha, jańa normatıv jol qurylysynyń barlyq kezeńinde qorshaǵan ortaǵa keletin áserdi azaıtyp, tabıǵı resýrstardy utymdy paıdalanýǵa múmkindik beredi.
Qazirgi ýaqytqa deıin jol salasyndaǵy ekologııalyq talaptar tek usynymdyq sıpattaǵy qujattarmen rettelse, jańa normatıv olardy mindetti túrde oryndalatyn talaptarǵa aınaldyrady.
– Joba sý resýrstaryn qorǵaýǵa erekshe nazar aýdarady. Atap aıtqanda, qurylys alańdarynda jerústi sýlaryn burý júıesin uıymdastyrý, lastanǵan sýdy tazartý, tazartylmaǵan aǵyn sýlardyń sý aıdyndaryna tógilýine jol bermeý jáne munaı ónimderi tógilgen jaǵdaıda jedel áreket etý sharalary qarastyrylǵan, – dep málimdedi QazjolǴZI.
Qujatta jer resýrstaryn saqtaý máseleleri de qamtylǵan. Soǵan sáıkes qurylys bastalar aldynda topyraqtyń qunarly qabaty mindetti túrde alynyp, bólek saqtalady jáne keıin búlingen aýmaqtardy rekýltıvatsııalaý kezinde paıdalanylady.
Sonymen qatar joldardy jobalaý jáne salý kezinde janýarlardyń mekendeý ortasy, kóshi-qon joldary, balyqtardyń ýyldyryq shashatyn oryndary men qustardyń uıa salatyn aýmaqtary eskeriledi. Qajet bolǵan jaǵdaıda qorshaýlar ornatý jáne arnaıy eskertý belgilerin qoıý kózdelgen.
Aıta keteıik, Almatyda ekologııalyq talaptardy buzǵan 200 kólik anyqtaldy.
