Qazaqstanda 2026 jyly turǵyn úı baǵasy qalaı ózgeredi
ALMATY. KAZINFORM – Jyljymaıtyn múlik salasynyń sarapshylary Kazinform agenttigi tilshisine Qazaqstandaǵy turǵyn úı naryǵyndaǵy qazirgi ahýaldy jáne 2026 jyly onyń qalaı ózgeretinin aıtyp berdi.
Turǵyn úı naryǵyndaǵy qazirgi ahýal
Jyljymaıtyn múlik agenttiginiń basqarýshy dırektory ári sarapshy Vıtalıı Shalaevtyń aıtýynsha, 2025 jylǵy jeltoqsan aıyndaǵy jaǵdaı boıynsha Qazaqstandaǵy turǵyn úı naryǵynda baǵa 2024 jylmen salystyrǵanda shamamen 20% tómendegen.
Onyń sózinshe, 2025 jyldyń sońynda naryqtaǵy 2024 jylǵy stagnatsııa (toqyraý) úrdisi saqtalǵan.
– Aılar boıynsha dınamıkany qarastyrsaq, qańtar aıynda satylym jaqsy boldy, bul – negizinen aldyńǵy jyldyń sońynan aýysqan suranystyń áseri. Al odan keıingi segiz-toǵyz aı boıy naryqtaǵy belsendilik birtindep tómendep, satylym kólemi de azaıa tústi. Ahýal tek qazan, qarasha jáne jeltoqsan aılarynda ońala bastady. Bul kezeńdegi ósim kóbine laksherı sanatyndaǵy iri mámileler esebinen múmkin boldy, - deıdi ol.
Colliers Kazakhstan kompanııasynyń aǵa keńesshisi Álı Orynbaev 2025 jyly elimizdiń birneshe qalasynda turǵyn úı baǵasy edáýir ósip, keı óńirlerde bul kórsetkish tipti eki tańbaly deńgeıge jetkenin atap ótti.
Máselen, 2025 jylǵy qańtar-qazan aılary aralyǵynda bastapqy turǵyn úı quny 2024 jyldyń sáıkes kezeńimen salystyrǵanda Pavlodarda 122%, Shymkentte 113%, Almatyda 111% ósken. Al respýblıka boıynsha ortasha kórsetkish – 109%.
Onyń aıtýynsha, bul úrdiske eń áýeli ıpotekalyq nesıeleý sharttary áser etti. Atap aıtqanda, «7-20-25» baǵdarlamasy aıasynda lımıtterdiń kóbeıýi ekonom jáne komfort sanatyndaǵy turǵyn úıge suranysty edáýir arttyrǵan.
Sonymen qatar bazalyq mólsherlemeniń 18%-ǵa deıin ósýi jáne tıimdi syıaqy mólsherlemesiniń 20%-ben shektelýi kommertsııalyq ıpotekanyń kólemin qysqartyp, naryqtaǵy belsendilikti ishinara báseńdetti.
Usynys kólemi de óz áserin tıgizip otyr. 2025 jyly rekordtyq deńgeıde – 14,6 mln sharshy metr turǵyn úı paıdalanýǵa berildi, bul kórsetkish aldyńǵy jyldardaǵy ortasha deńgeıden 7% joǵary.
Paıdalanýǵa berilgen turǵyn úıdiń shamamen jartysy – 47%-y Almaty, Astana jáne olarǵa irgeles óńirlerdiń úlesine tıesili. Alaıda rekordtyq kólemge qaramastan, usynys ázirshe baǵanyń ósýin tolyq tejeýge jetpeı otyr.
Budan bólek, úlestik qurylys salasyndaǵy retteýdiń qatańdatylýy da qosymsha faktorǵa aınaldy. Bul ózgerister naryqtyń ashyqtyǵy men boljamdylyǵyn arttyrǵanymen, sonymen qatar jańa jobalardyń ózindik qunynyń ósýine sebep bolyp otyr.
Jańa jyl qarsańyndaǵy suranystyń artýy
Vıtalıı Shalaevtyń aıtýynsha, jeltoqsan aıyna tán dástúrli suranys ósimi negizinen iri qalalarda baıqaldy.
– Naryqtyń negizgi úsh «lokomotıvi» – Almaty, Astana jáne Shymkent barlyq mámile kóleminiń shamamen 70%-yn qamtamasyz etip otyr. Bul qalalarda turǵyn úı satyp alýǵa suranys artqanymen, belgili bir teńgerimsizdik te qalyptasty: suranys bar, biraq baǵalar áli de joǵary. Sonyń saldarynan satyp alýshylar sheshim qabyldaýǵa kóbirek ýaqyt jumsap, ózderiniń oıyndaǵy baǵaǵa saı keletin nysandardy muqııat tańdaı bastady, - deıdi ol.
Al Álı Orynbaev jeltoqsan aıy dástúrli túrde naryqtaǵy belsendilik eń joǵary deńgeıge jetetin kezeń ekenin eske saldy. Bul ýaqytta mámileler sany qarasha aıymen salystyrǵanda orta eseppen 23% artady.
2026 jyly ne kútemiz
Vıtalıı Shalaevtyń paıymdaýynsha, qurylys kompanııalary baǵany kúzden bastap kótere bastaǵan. Ásirese, bul úrdis Astanada qarasha aıynda anyq baıqaldy. Іri developerler baǵany 15-20% ósirse, al jekelegen jobalarda baǵa 30% kóterilgen. Mundaı kúrt ósý satyp alýshylar úshin kútpegen jaıt boldy.
Baǵanyń odan ári ósýine áser etetin negizgi sebepter:
- QQS boıynsha jeńildiktiń joıylýy jáne mólsherlemeniń 12%-dan 16%-ǵa deıin kóterilýi;
- Dollar baǵamynyń ósýi, sonyń saldarynan qurylys materıaldary men túrli shyǵyn materıaldary qunynyń artýy.
Sarapshynyń boljamynsha, 2026 jyly jańadan salynatyn turǵyn úılerdiń baǵasy shamamen 20% ósedi. Alaıda suranys 2025 jyly qalyptasqan stagnatsııa deńgeıinde saqtalady. Baǵa men halyqtyń tólem qabileti arasyndaǵy alshaqtyq ulǵaıyp, osydan mámileler sany azaıady.
Jańa úılerden keıin qaıtalama naryqtaǵy baspana da qymbattaıdy. Qazirdiń ózinde keıbir menshik ıeleri alda baǵanyń ósetinin kútip, óz nysandaryn satylymnan ýaqytsha alyp tastaǵan.
Al Álı Orynbaev Jańa jyldan keıin baǵanyń kúrt óspeıtinine senimdi, óıtkeni QQS kóterilýi naryqqa birden áser etpeıdi, bul úrdis kezeń-kezeńimen baıqalady. Onyń aıtýynsha, developerlik jobalardy iske asyrý tsıkli ádette bir jyldan da uzaq ýaqytty alady, sondyqtan QQS tolyqqandy áseri keıinirek seziledi.
– Developerler artqan shyǵyndardyń bir bóligin óz shyǵystaryn ońtaılandyra otyryp nemese baǵanyń marjınaldylyǵyn jańa naryq jaǵdaıyna beıimdeý arqyly óteýge alady. Sonymen qatar QQS ósiminiń bir bóligi qazirgi baǵalarǵa engizilgendikten, 2026 jyly baǵa birshama birqalypty túrde ósedi, - deıdi ol.
Ipotekalyq nesıe
Vıtalıı Shalaevtyń aıtýynsha, ıpotekaǵa maquldaý alǵan ótinishterdiń sany qazir aıtarlyqtaı azaıǵan. Bul jaǵdaıǵa basty sebep – merzimi ótip ketken qaryzdardyń kóbeıýi. 2025 jyly merzimi ótip ketken qaryz kólemi 2024 jylmen salystyrǵanda shamamen 25% artqan.
– Osyǵan baılanysty bankter qaryz alýshylarǵa qoıylatyn talaptardy kúsheıtti: klıentterdi tekserý qatańdatylyp, maquldanbaǵan ótinish sany artty. Buryn bastapqy jartylaı jarna bolǵan jaǵdaıda ońaı maquldanyp kelgen «50/50» baǵdarlamasy qazir áldeqaıda sırek rásimdeletin boldy. Bankter táýekeldi azaıtyp, merzimi ótken tólemderdiń múmkindigin tómendetýge tyrysady, sondyqtan ıpotekany tek senimdi klıentterge beredi, - deıdi ol.
Ipotekalyq suranystyń tómendeýiniń ekinshi sebebi – tabys dınamıkasynyń tómen bolǵanyna qaramastan, turǵyn úı baǵasynyń ósýi.
– Halyqtyń naqty tabysy ósip jatqan joq nemese jylyna tek 3-5% artyp otyr, al turǵyn úı 15-20% qymbattady. Satyp alýshylardyń múmkindikteri men bir sharshy metrdiń naqty baǵasy arasyndaǵy alshaqtyq kúrt ósip otyr. Mundaı jaǵdaıda ekonom jáne komfort sanatyndaǵy úılerdiń satyp alýshylary baspanaly bolý josparyn keıinge qaldyrady, óıtkeni ıpotekalyq nesıeni tóleı almaıtynyn biledi, - deıdi sarapshy.
2026 jylǵa baǵa boljamy
Shalaevtyń baǵalaýynsha, qańtar aıynda jańadan salynatyn úılerdiń baǵasy jeltoqsanmen salystyrǵanda 10-15% ósýi múmkin. Odan keıin qaıtalama naryq ta ilese qymbattaıdy.
Onyń aıtýynsha, qazirgi ýaqytta shamamen 20% menshik ıeleri baǵanyń ósýin kútip, nysandaryn satylymnan alyp tastaǵan. Sondyqtan 2026 jyly olar naryqqa qaıta shyǵatyn kezde baǵa áldeqaıda joǵary bolady.
– 2026 jyldyń basynda mámileler azaıady: satyp alýshylar baǵanyń kúrt ósýine áli daıyn emes. Alǵashqy úsh aıda naryq «tynysh» kúıde bolady – usynys kóp, baǵa joǵary, suranys shekteýli. Keıin satýǵa asyqqan menshik ıeleri baǵany birtindep tómendetedi. Jyldyń ekinshi jartysynda, qyrkúıek-qazan aılaryna qaraı, naqty mámileler boıynsha baǵa jyl basyndaǵy deńgeımen salystyrǵanda shamamen 10-15% azaıýy múmkin. Al keı jaǵdaılarda jeńildik 20%-ǵa deıin jetýi yqtımal, - deıdi ol.
Álı Orynbaev 2026 jyly Qazaqstanda turǵyn úı baǵasy birtindep ósetinin aıtty. Onyń boljamynsha, jyl saıynǵy ósim jalpy naryqta 7-12% deńgeıinde bolady. Bul úrdis josparly túrde júrip, ınflıatsııa, salyq ózgeristeri, usynystyń shekteýli bolýy jáne ıpotekalyq sharttar sııaqty faktorlardyń áserin kórsetedi.
Alaıda iri qalalarda, sonyń ishinde respýblıkalyq mańyzy bar qalalarda baǵanyń ósý qarqyny áldeqaıda joǵary bolýy múmkin.
Turǵyn úıdi qashan satyp alǵan tıimdi
Shalaevtyń pikirinshe, eń qolaıly sát – adamnyń ózinde naqty nıet bolǵan jáne ózine laıyq nysan tapqan kez.
Onyń aıtýynsha, eger satyp alýshy ınvestor nemese naryqtyń kásibı qatysýshysy bolmasa, «qolaıly ýaqytty» kútý esh nátıje bermeıdi, mundaı ýaqyt shyn máninde bolmaıdy.
– Suranys tómendegende naryqtaǵy sapaly nysandar kóbine tez satylyp ketedi nemese menshik ıeleri baǵanyń ósýin kútip, satpaı qoıady. Sondyqtan ózi úshin úı alǵysy keletinder qolaıly nysan shyqqan sátte dereý áreket jasaǵany jón. Ornalasqan jeri, jaǵdaıy jáne baǵasy barlyq talapqa sáıkes kelse, eń tıimdi baǵaǵa kelisip, mámileni aıaqtaǵan durys. Uzaq júrip alsa, sapaly usynystardan qaǵylyp, satyp alýshyǵa qoljetimdi, biraq onsha emes nysandar ǵana qalady, - deıdi ol.
Álı Orynbaev bolsa, turǵyn úı satyp alýǵa eń qolaıly kezeń – dál qazirgi ýaqyt dep esepteıdi. Sebebi jańa salyqtyq jáne retteýshi talaptar áli tolyqtaı qurylys qunyna engizilmegen.
Onyń aıtýynsha, naryq ózgeristerge birtindep beıimdeledi, sondyqtan turǵyn úıdiń sharshy metri baǵasy kezeń-kezeńmen ósedi.
– Ipotekamen úı alýdy josparlap otyrǵan adamdar naryq ózgeriske ushyramas buryn, jeńildikpen beriletin ıpotekalyq baǵdarlamalardyń qoljetimdi ekenin dál qazir teksergeni jón. Al ınvestorlar turǵyn úı baǵasy men jaldaý tólemderiniń aıyrmashylyǵyn eskerýi kerek. Keıbir qalalarda turǵyn úı baǵasy jaldaý tóleminen jyldamyraq ósip keledi, budan tabys tómendeıdi. Sondyqtan mundaı jaǵdaıda satyp alý kútýden góri tıimdi sheshim bolar edi. Mysaly, Almatyda turǵyn úı baǵasy jaldaý tóleminen 7,5% jyldam ósip keledi. Al Astanada jaǵdaı kerisinshe: jaldaý tóleminiń ósý qarqyny turǵyn úı baǵasynyń ósýinen 14% joǵary, - deıdi ol.
Jaldaý naryǵy jáne 2026 jylǵa boljam
Vıtalıı Shalaevtyń paıymdaýynsha, 2025 jyly páterlerdi jalǵa alý suranysy tómendedi, al jaldaý quny 2024 jylmen salystyrǵanda tómendedi.
Páterdiń kóbi 6-8 aı boıy jalǵa berilý úshin tursa da, tek baǵa tómendegennen keıin jalǵa alýshyny tabady. Kerek deseńiz, dástúrli túrde belsendi kezeń sanalatyn tamyz-qyrkúıek aılarynda da maýsymdyq suranystyń kúrt ósýi baıqalmady.
– Bul úrdis 2026 jyly da saqtalýy múmkin. Degenmen, kerisinshe áser etýi múmkin faktor bar: satyp alý-satý mámileleriniń sany azaıǵanymen, iri qalalarǵa kóship keletin adamdarǵa turǵyn úı qajet. Negizgi suranys jaldaý quny aıyna shamamen 300-400 myń teńge turatyn páterlerge túsedi. Osy aralyqtaǵy páterler turaqty túrde jalǵa beriledi, - dep esepteıdi ol.
Qymbat páterlerdi jalǵa berý qıyndaý bolady. Mundaı páterlerdi jalǵa berý úshin 2-3, keıde 4 aı ýaqyt ketýi múmkin, óıtkeni suranys az.
Álı Orynbaev iri qalalarda jaldaý aqysy birtindep ósýi múmkin dep boljaıdy. Sebebi keıbir áleýetti satyp alýshylar ıpotekaǵa ala almaı, jaldap turýǵa májbúr bolady.
Bir jáne eki bólmeli páterlerdiń baǵasy aıtarlyqtaı kóteriledi. Bul sanatta suranys turaqty, ári ıpotekalyq naryqtaǵy ózgeristerge táýeldi. Sonymen qatar keıbir qalalardaǵy baǵaǵa mıgratsııa, stýdentterdiń aǵymy jáne ýrbanızatsııa trendi áser etedi, bul jaldaý qunynyń ósýine taǵy qysym jasaıdy.
Eske salaıyq, buǵan deıin Qazaqstanda qaıtalama naryqtaǵy turyn úı baǵasy jyl basynan beri shamamen 5,4% óskenin habarlaǵanbyz.