Qazaqstanda 2026 jylǵy Azııa oıyndarynyń resmı bılet agenti anyqtaldy
ASTANA. KAZINFORM – «MTK Complete Service» JShS Qazaqstan aýmaǵyndaǵy HH jazǵy Azııa oıyndarynyń resmı bılet agenti bolyp taǵaıyndaldy. Qurlyqtyq doda 2026 jyldyń 19 qyrkúıegi men 4 qazany aralyǵynda Japonııanyń Aıchı jáne Nagoıa qalalarynda ótedi, dep habarlaıdy Qazaqstanyń Ulttyq olımpıada komıteti.
Kompanııanyń bul mártebesi 2026 jylǵy Azııa oıyndarynyń Uıymdastyrý komıteti men Qazaqstan Respýblıkasy Ulttyq Olımpıadalyq komıteti arasynda jasalǵan bılet agenttigi týraly kelisim aıasynda bekitildi.
«Complete Service» uıymdastyrý komıteti belgilegen talaptar men erejelerge sáıkes Qazaqstan turǵyndaryna Azııa oıyndarynyń jarystaryna arnalǵan resmı bıletterdi satý quqyǵyna ıe bolady. Budan bólek, kompanııa Azııa oıyndaryna baratyn jankúıerlerge qonaqúıge ornalastyrý, kólik qyzmetin uıymdastyrý jáne jarystarǵa sapardy josparlaýǵa qatysty ózge de týrıstik qyzmetterdi usyna alady.
Halyqaralyq «Complete Service» kompanııasy Qazaqstannyń týrıstik naryǵynda 1999 jyldan beri jumys isteıdi jáne álemdik deńgeıdegi iri sporttyq jarystarǵa sapar uıymdastyrýda mol tájirıbege ıe.
Ár jyldary kompanııa Beıjińdegi (2008), Londondaǵy (2012), Rıo-de-Janeırodaǵy (2016) jáne Tokıodaǵy (2020) Olımpıada oıyndarynda resmı bılet agenti, týroperator jáne seriktes retinde qyzmet atqarǵan.
Resmı bılet agentiniń taǵaıyndalýy Qazaqstan aýmaǵynda bıletterdi ortalyqtandyrylǵan tártippen satýǵa múmkindik beredi. Sonymen qatar jankúıerlerge jarystarǵa sapar barysynda qajet bolatyn qosymsha qyzmetter qoljetimdi bolady.
Qazaqstandaǵy resmı bılet agenti arqyly bıletterdiń satylymǵa shyǵatyn merzimi, olardy satyp alý tártibi jáne usynylatyn qosymsha qyzmetter týraly aqparat keıinirek jarııalanady.
Osyǵan deıin Qazaqstan quramasynyń Azııa oıyndaryndaǵy komandalyq sport túrleri boıynsha qarsylastary anyqtalǵany týraly jazdyq.
