2026 jyldan bastap ár taýardyń eń tómengi baǵasy qalaı esepteledi
ASTANA. KAZINFORM – Qarjy mınıstri mindetin atqarýshynyń buıryǵymen 2026 jyldan bastap eń tómengi baǵa qoıylatyn taýarlar tizbesi men ony esepteý qaǵıdalary bekitildi.
Taýarlar tizbesi eki topqa bólingen:
Qazaqstanda óndiriletin taýarlar, onyń ishinde:
– etıl spırti, konıak jáne araq;
– taýyq jumyrtqasy;
– bıdaı uny jáne bıdaı;
– kúnbaǵys maıy;
– ashytqy;
– súzbe jáne balqytylǵan irimshikter;
– kókónister (kartop, qyryqqabat, sábiz), alma;
– makaron ónimderi;
– et jáne shujyq ónimderi;
– mıneraldy tyńaıtqyshtar;
– antıfrız;
– mıneraldy maqta jáne basqa da pozıtsııalar.
Qazaqstanda óndirilmeıtin taýarlar:
banan, apelsın, mandarın, qurma, shampınon, kókjıdek, keıbir organıkalyq eritkishter men otqa tózimdi keramıkalyq materıaldar taǵy basqa.
Eń tómengi baǵa qalaı esepteledi
Memlekettik kirister organy jyl saıyn 28 aqpanǵa, 31 mamyrǵa, 31 tamyzǵa jáne 30 qarashaǵa deıin ýákiletti memlekettik statıstıka organynan ár taýar túri boıynsha sońǵy úsh aıdyń ortasha baǵasyn suratady. Óndirýshilerdiń ortasha baǵasy taýardyń ólshem birligine shaqqandaǵy teńgemen beriledi.
Memlekettik kirister organy jyl saıyn 15 naýryzdan, 15 maýsymnan, 15 qyrkúıekten jáne 15 jeltoqsannan keshiktirmeı ár taýar túri boıynsha eń tómen baǵa deńgeıin eseptep, ony kgd.gov.kz resmı ınternet-resýrsynda jarııalaıdy.
Esepteý tásili
Qazaqstanda óndiriletin taýarlarǵa arnalǵan eń tómengi baǵa deńgeıi:
- óndirýshi kásiporyndardyń ortasha baǵasy men ákelinetin taýarlardyń ortasha qunynyń arıfmetıkalyq ortasy arqyly esepteledi.
Qazaqstanda óndirilmeıtin taýarlar boıynsha eń tómengi baǵa:
- kedendik qundy baqylaý kezinde paıdalanylatyn baǵalyq aqparattyń ortasha máni men sońǵy úsh aıda Qazaqstanǵa ákelingen taýarlardyń ortasha qunynyń arıfmetıkalyq ortasy retinde aıqyndalady.
Bul kórsetkish tek taýarlardy ımporttaý kezinde qosylǵan qun salyǵy (QQS) somasyn esepteý úshin qoldanylady.
Eń tómen baǵa deńgeıi jyl saıyn 1 qańtar men 31 naýryz aralyǵynda, 1 sáýir men 30 maýsym, 1 shilde men 30 qyrkúıek, sondaı-aq 1 qazan men 31 jeltoqsan aralyǵynda aıqyndalady.
Buıryq 2026 jylǵy 1 qańtardan bastap kúshine enedi.
Aıta ketsek, taıaýda ǵana Saýda mınıstrligi baǵa ósimin tejeý úshin erikti kelisimder jasaý bastamasyn kóterdi.
Eske salaıyq, Saýda mınıstrligi buǵan deıin de baǵa turaqtylyǵyna baqylaýdyń kúsheıetinin málimdegen edi.