Qazaqstanda 2025 jylǵa qaraı 4 trln teńge salyq jınaý kózdelip otyr

ASTANA. QazAqparat - Qazaqstan jańa Salyq kodeksiniń nátıjesinde 2025 jylǵa qaraı qosymsha 4 trln teńge salyq jınaýdy josparlap otyr. Bul týraly búgin Global Challenges Summit 2018 forýmynyń ekinshi kúngi jalpy otyrysynda QR Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.

«Búginde ekonomıkalyq ósimniń jańa modeli, sapaly ekonomıkalyq ósimge kóshý qajettigin túsinemiz. Ol ekonomıkanyń ındýstrıaldy tehnologııalyq transformatsııasynyń módeli retindegi tórtinshi ónerkásiptik revolıýtsııa ekendigi sózsiz. Al «Rýhanı jańǵyrý» adam kapıtalyn keshendi damytý baǵdarlamasyna kelsek, qoǵamdyq sanany jańǵyrtpaı ekonomıkany jańǵyrtý múmkin emes. Memleket basshysy usynǵan taǵy bir jańa strategııa qazaqstandyqtarǵa arnalǵan áleýmettik topta 5 áleýmettik bastama bar», - dedi Baqytjan Saǵyntaev.

Osy rette Premer-Mınıstr bul strategııalyq mindetterdiń qalaı oryndalatyndyǵyna toqtaldy.

«Bul oraıda úsh deńgeıdi anyqtap alýǵa bolady. Birinshisi bizge qajetti júıeli reforma bolmaq. Biz ol jaıynda aıtqan kezde jekeshelendirý arqyly júrgiziletin ekonomıkanyń qurylymdyq ózgeristerine basa nazar aýdaramyz. Qazirgi ýaqytta jekeshelendirýdiń ekinshi tolqyny aıasynda 800-den astam kompanııa satylymǵa shyǵaryldy. Protsess josparǵa saı júrgizilýde», - dedi ol.

Onyń atap ótýinshe, jekeshelendirýge shyǵarylǵan 65-top kompanııa barlyq ınvestorlardyń qyzyǵýshylyǵyn týdyryp otyr. Onyń ishinde 9 ulttyq strategııalyq kompanııa ІRO arqyly jekeshelendiriletin bolady. Aǵymdaǵy jyly «Eır Astana», «Qazatomónerkásip», «Qazaqtelekom» kompanııalary ІRO-ǵa shyǵyrlady dep kútilýde.

Sonymen qatar ol Qazaqstanda qabyldanǵan jańa Salyq kodeksine de toqtaldy.

«Ótken jyly biz jańa Salyq kodeksin qabyldap, ol aǵymdaǵy jyldyń basynan qoldanysqa endi. Salyq reformasy ınvestıtsııalyq ósim kózderin izdeýge baǵyttalǵan. Atalǵan ózgeristerdiń aıaǵynda biz 2025 jylǵa qaraı qosymsha 4 trln teńge salyq jınaýdy josparlap otyrmyz», - dedi Baqytjan Saǵyntaev.