Qazaqstanda 2025 jylǵa deıin azamattardyń ómir súrý uzaqtyǵyn 75 jasqa jetedi - QDSUO
NUR-SULTAN. QazAqparat – Qazaqstanda 2025 jyly azamattardyń ómir súrý uzaqtyǵyn 75 jasqa deıin arttyrý kózdelip otyr.
Bul týraly búgin QR DSM Qoǵamdyq densaýlyq saqtaý ulttyq ortalyǵynyń basqarma tóraǵasy Jámıla Battaqovanyń tóraǵalyq etýimen «Salaýatty ómir saltyn qalyptastyrýdyń jańa tásilderi boıynsha 2022-2025 jyldarǵa arnalǵan Ulttyq joba» tujyrymdamasynyń jobasyn talqylaýǵa arnalǵan onlaın-keńeste málim boldy.
Jıynda Jámıla Battaqova QDSUO jáne QR Densaýlyq saqtaý mınıstrligi ázirlegen «Salaýatty ómir saltyn qalyptastyrýdyń jańa tásilderi boıynsha 2022-2025 jyldarǵa arnalǵan Ulttyq joba» tujyrymdamasymen tanystyrdy.
Tujyrymdamanyń basym baǵyty retinde durys tamaqtaný, temeki shegý jáne ishimdik ishýdi azaıtý, dene belsendiligin arttyryp, densaýlyq saqtaýdy damytý, psıhıkalyq jáne reprodýktıvti densaýlyqty saqtaý, jaraqat alýdy azaıtý, áleýmettik jeliler arqyly halyqty densaýlyq saqtaýǵa shaqyrý, ÚEU-ǵa kómek kórsetý, densaýlyq saqtaý baǵdarlamalaryn jáne epıdqadaǵalaýdy engizý sııaqty máseleler ataldy.
Qujatta kórsetilgen mindetter sátimen júzege asyrylsa, 2025 jylǵa qaraı azamattardyń ómir súrý uzaqtyǵyn 75 jasqa deıin arttyryp, salaýatty ómir saltyn ustanatyn azamattar sanyn 5%-ǵa deıin ulǵaıtý, juqpaly emes aýrýlardy 7%-ǵa deıin tómendetý, halyqtyń densaýlyq saqtaý salasyndaǵy saýattylyǵyn - 70 % arttyrý, artyq salmaǵy bar jáne semizdikke shaldyqqan balalar úlesin 10% tómendetý, tuzdy tutynýdy táýligine 5 gramǵa deıin azaıtý sııaqty jetistikterge jeýge bolady.
Keńeske qatysýshylar QR Salaýatty ómir saltyn qalyptastyrýdyń jańa tásilderin dáripteý boıynsha Ulttyq joba tujyrymdamasyna ózderiniń usynystaryn engizdi.
