Qazaqstanda 2025 jylǵa deıin 11 myń shaqyrym jol jóndeledi
NUR-SULTAN. QazAqparat – «QazAvtoJol» UK» AQ Basqarma tóraǵasy Ulan Álipov «Nurly jol 2» baǵdarlamasy boıynsha qyzý jumys júrgizilip jatqanyn málim etti, dep habarlaıdy QazAqparat tilshisi.
«Bıyl bizdiń elde jóndeý jumystarymen 4 myń shaqyrym jol qamtyldy. Jalpy «Nurly jol 1» jáne «Nurly jol 2» baǵdarlamasy boıynsha jospardy oryndap kelemiz. ıAǵnı 2015-2020 jyl aralyǵynda «Nurly jol 1» baǵdarlamasy boıynsha jumysty aıaqtap, 13 myń shaqyrym joldy qaıta jóndeýden ótkizdik. 8 myń shaqyrym joldy І jáne ІІ sanatty joldardyń qataryna engizdik. Bıyldan bastap «Nurly jol 2» baǵdarlamasy bastaldy. Bul joly 2020-2025 jylǵa deıingi aralyqta jol jóndeý jumystary bastalady. Oǵan sáıkes jalpy 24 myń shaqyrym joldy «jaqsy» jáne «qanaǵattanarlyq» jaǵdaıǵa jetkizýdi kózdeımiz. Onyń ishinde joldyń 60 paıyzy І jáne ІІ sanatqa engiziledi», - dedi Ulan Álipov «QazAvtoJol» ulttyq kompanııasynyń tikeleı efırinde sóılegen sózinde.
Kompanııa basshysynyń aıtýynsha aldaǵy bes jyldyń ishinde 11 myń shaqyrym jol jóndeledi.
«Bıyl 2600 shaqyrym joldy asfaltty-betondy jabyndymen japsaq deımiz. Bul – rekordtyq kórsetkish. Atap aıtqanda Qaraǵandy – Balqash – Almaty joldary osy jabyndymen qamtylady. Qazir osy aralyqta qyzý jumys júrgizilýde. Aqtóbe – Atyraý – Astrahan jolynda da jumys qarqyndy. Uzynaǵash – Otar, Qarabutaq – Komsomolskaıa – Denısovka – Qostanaı, Úsharal – Dostyq, Nur-Sultan – Petropavl, Taskesken – Baqty, Taldyqorǵan – Óskemen, Merke - Býrylbaıtal jolynda da jóndeý jumystary jalǵasýda», - dedi ol.
