Qazaqstanda 2025 jyly EAEO syrtqy shekarasyndaǵy 9 ótkizý pýnkti jańǵyrtyldy
ASTANA. KAZINFORM- Qazaqstanda 2025 jyly EAEO syrtqy shekarasyndaǵy 9 avtomobıl ótkizý pýnktin jańǵyrtý jumystary aıaqtaldy. Osy jyldyń qazan aıynda qazaq-ózbek shekarasyndaǵy «Jibek joly» ótkizý pýnktin jańǵyrtý jumystary aıaqtalady, dep habarlaıd Úkimettiń baspasóz qyzmeti.
Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda aıqyndaǵan mindetterin júzege asyrý aıasynda Úkimet atynan Qarjy mınıstrliginiń Memlekettik kirister komıteti shekara ınfraqurylymyn jańǵyrtý jumystaryn jalǵastyryp jatyr.
Jumys ótkizý pýnktteriniń ótkizý qabiletin arttyrýǵa, shekaradan ótý ýaqytyn qysqartýǵa, baqylaý rásimderin tsıfrlandyrýǵa jáne avtokólik tasymaldaýshylaryna kórsetiletin qyzmetter sapasyn jaqsartýǵa baǵyttalǵan.
Sonymen qatar Kólik mınıstrligi EAEO-nyń ishki shekaralarynda avtomobıl ótkizý pýnktterin jańartýdy jalǵastyrýda.
Búginde Qazaqstannyń memlekettik shekarasynda 70 ótkizý pýnkti jumys isteıdi. Onyń 51-i avtomobıl, 5-eýi temirjol, 10-y áýe, 3-eýi teńiz pýnkti bolsa, 1 ótkizý pýnkti «Qorǵas» ShYHO aýmaǵynda ornalasqan. 51 avtomobıl ótkizý pýnktiniń 14-i EAEO-nyń syrtqy shekarasynda, taǵy 37-si Reseı men Qyrǵyzstan shekarasynda ornalasqan.
Osyǵan deıin shekaradaǵy ótkizý pýnktterin jańǵyrtý jumystarynyń nátıjesi týraly jazdyq.
