Qazaqstanda 2025 jyly balmuzdaq eksporty ımporttan asyp tústi
ASTANA. KAZINFORM – 2025 jyly Qazaqstan tarıhynda alǵash ret balmuzdaq eksporty ımport kóleminen asty. Jyl qorytyndysy boıynsha eksport kólemi 14 167 tonnany qurasa, ımport 12 194 tonna boldy. Bul týraly Saýda jáne ıntegratsııa mınıstrligi habarlady.
Atalǵan kórsetkish saladaǵy júıeli ózgeristerdi jáne otandyq óndirýshilerdiń halyqaralyq naryqtardaǵy pozıtsııasynyń nyǵaıýyn aıqyndaıdy.
«Shın-Laın» kompanııasynyń korporatıvtik máselelerjónindegi vıtse-prezıdenti Omarbek Juldyzdyń aıtýynsha, qol jetkizilgen nátıje uzaqmerzimdi jańǵyrtý strategııasymen eksporttyq ekspansııanyń jemisi.
– 2005 jyly Qazaqstan nebári 12 tonna balmuzdaq eksporttap, 12 myń tonnadan astam ónim ımporttaǵan bolatyn. Búginde jaǵdaı túbegeıli ózgerdi: jetkizý geografııasy 10 elge deıin keńeıdi, al eksport alǵash ret ımporttan basym tústi. Bul qazaqstandyq ónimniń joǵary básekege qabilettiligin jáne salanyń kemeldengenin kórsetedi, - dedi ol.
Onyń sózinshe, ósimniń negizgi faktorlary – zamanaýı óndiristik qýattardy qurýǵa baǵyttalǵan aýqymdy ınvestıtsııalar, ozyq tehnologııalardy engizý, sondaı-aq otandyq óndirýshilerdi júıeli memlekettik qoldaý. Eksporttyq túsimniń artýy jáne ortasha eksporttyq baǵanyń ósýi baǵa básekesinen sapa men brendter básekesine kóshý úderisin aıqyn dáleldeıdi.
Qazaqstandyq balmuzdaq eksportynyń negizgi úlesin qamtamasyz etetin «Shın-Laın» kompanııasy halyqaralyq naryqtaǵy pozıtsııasyn nyǵaıtýdy jalǵastyryp, otandyq kásiporyndardyń turaqty eksporttyq úrdis qalyptastyrý jáne «Qazaqstanda jasalǵan» brendin jahandyq naryqtarda ilgeriletý áleýetin kórsetip keledi.
Eske sala keteıik, buǵan deıin BQO ýnıversıtetinde túıe sútinen balmuzdaq pen ıogýrt jasaý qolǵa alynǵanyn jazǵanbyz.