Qazaqstanda 2025 jyly 4 mln-nan astam bala profılaktıkalyq tekserýden ótti

ASTANA. KAZINFORM — 2025 jyly Qazaqstanda balalardyń densaýlyǵyn saqtaý jáne erte anyqtaý sharalary aıasynda 4 mıllıonnan astam bala profılaktıkalyq medıtsınalyq tekserýden ótti. Bul týraly Densaýlyq saqtaý mınıstrliginiń baspasóz qyzmeti habarlady.

Vedomstvo málimetinshe, ótken jyly 2 mıllıonnan astam bala aýdıologııalyq skrınıngten jáne psıhofızıkalyq damý baǵalaýynan ótti. Sonymen qatar 300 myńnan astam sábı neonataldyq skrınıngpen, al shamamen 13 myń bala oftalmologııalyq tekserýmen qamtylǵan.

Balalarǵa kórsetiletin medıtsınalyq kómektiń qoljetimdiligin arttyrý maqsatynda emhanalar bazasynda 209 pedıatrııalyq bólimshe jáne 290 damý men erte aralasý ortalyǵy ashyldy. Bul sharalar týa bitken damý aqaýlaryn erte kezeńde anyqtaýǵa múmkindik berdi.

Sondaı-aq turǵylyqty jeri boıynsha emhanalar janynan qurylǵan erte aralasý ortalyqtarynda 50 myńnan astam bala qajetti medıtsınalyq kómek alǵan.

Balalarǵa medıtsınalyq kómektiń sapasyn arttyrý úshin 10 medıtsınalyq standart jáne ana men bala densaýlyǵyna qatysty 26 klınıkalyq hattama jańartyldy.

Densaýlyq saqtaý mınıstrligi bul sharalar balalardyń densaýlyǵyn qorǵaýdy kúsheıtýge jáne aýrýlardyń aldyn alýǵa baǵyttalǵanyn atap ótti.

Aıta keteıik, 2025 jyly sanıtarııalyq avıatsııa myńdaǵan adamdy qutqaryp qaldy.