Qazaqstanda 2021 jyly kommýnaldyq tarıfter óse me – komıtet jaýaby

NUR-SULTAN. QazAqparat – Tabıǵı monopolııalardy retteý komıtetiniń tóraǵasy Asan Darbaev 2021 jyly kommýnaldyq tarıfter bıylǵy deńgeıde saqtalatynyn málim etti, dep habarlaıdy QazAqparat tilshisi.

«Bul turǵyda Memleket basshysynyń 2021 jyly tarıfterdi saqtap qalýǵa qatysty tapsyrmasy bar. Aımaqtyq bólimshelerdiń bári atalmysh baǵytta aýqymdy jumys júrgizýde. Tabıǵı monopolııalar tarapynan jańa tarıfterdi bekitý týraly 143 ótinim qaraýymyzda jatyr. Ótinim boıynsha berilgen ósim deńgeıi barshylyq», - dedi Asan Darbaev OKQ-da ótken baspasóz máslıhatynda.

Komıtet basshysy bul ótinimder qaralatynyn jetkizdi.

«Buǵan deıin aıtyp ótkenimdeı, bizde tarıf ózgerisiniń oryndy bolýyn retteıtin naqty erejeler bar. Olar – ınvestıtsııalyq baǵdarlamardyń tartymdylyǵy, tarıftik smetalardy túzetý týraly erejeler. Osynyń bári bizge 2021 jyly halyq úshin tarıfterdi 2020 jylǵy deńgeıde saqtaýǵa kómektesedi», - dedi komıtet tóraǵasy.