Qazaqstanda 2021 jyly 6 myń shaqyrym jol salynady

NUR-SULTAN. QazAqparat - Infraqurylymdy damytýǵa arnalǵan «Nurly jol» memlekettik baǵdarlamasyn júzege asyrý aıasynda aldaǵy qurylys maýsymyndaǵy jumystar respýblıkalyq jáne jergilikti mańyzy bar joldyń 6 myń shaqyrymyn qamtıtyn bolady, dep habarlaıdy QazAqparat.

«Osylaısha, qurylys jáne rekonstrýktsııa respýblıkalyq mańyzy bar joldardyń 4,7 myń shaqyrymynda júrgizilmek. Budan bólek, jergilikti avtojoldar jelisiniń 1,3 myń shaqyrymy jol jóndeý jumystarynyń barlyq túrimen qamtylyp, jaqsy jáne qanaǵattanarlyq joldardyń úlesi 76 paıyzdy quramaq», - delingen QR Indýstrııa jáne ınfraqurylymdyq damý mınıstrligi málimetinde.

Sonymen qatar, 2021 jyldyń birinshi toqsanynda uzyndyǵy 5,8 myń shaqyrym bolatyn aqyly jol ýchaskelerin testilik paıdalanýǵa engizý josparlanýda. Al bıylǵy jyldyń ekinshi toqsanynda tolyqtaı iske qosylýy tıis.

Aıta ketý kerek, 2021 jyldyń sońyna deıin jol boıyndaǵy qyzmet kórsetý nysandarynyń 66%-yn Ulttyq standart talaptaryna sáıkestendirý kózdelip otyr. Budan bólek, rekonstrýktsııa aıasynda 40 sanıtarlyq-gıgıenalyq torapty ornatý jáne kútip ustaý josparlanýda. Jeke ınvestıtsııalar esebinen SGT bar 33 janarmaı beketi jáne 15 sanıtarlyq-gıgıenalyq torap turǵyzylmaq. Sondaı-aq, kelisim aıasynda jyl sońyna deıin «Compass»zamanaýı avtojoldar kesheniniń tórteýi salynady.