Qazaqstanda 2021 jylǵy 1 qańtardan bastap kimder deklaratsııa tapsyrýy kerek
QR Qarjy mınıstrligi Memlekettik kirister komıtetiniń jalpyǵa birdeı deklaratsııalaý basqarmasynyń basshysy Dına Qusaıynova alǵashqy kezeńde kimder deklaratsııa tapsyrýy kerektigin túsindirdi, dep habarlaıdy QazAqparat tilshisi.
«Jalpyǵa birdeı deklaratsııanyń basty maqsaty – kóleńkeli ekonomıkamen kúres, sybaılas jemqorlyqqa qarsy quraldy qalyptastyrý ári el bıýdjetin tolyqtyrý. Jalpyǵa birdeı deklaratsııalaýǵa eldiń árbir azamatynyń ómirin jaqsartýdyń kóptegen múmkindigi kiredi. 2021 jylǵy 1 qańtardan bastap bizdiń bárimiz jalpyǵa birdeı deklaratsııalaý júıesine enemiz. Alǵashqy kezeńde oǵan memlekettik qyzmetshiler, olarǵa teńestirilgen jubaılary kiredi», - dedi Dına Qusaınova AntikorLive baspasóz máslıhatynda.
Onyń aıtýynsha, memlekettik qyzmetkerler buryn kórsetpegen belgili bir aktıvter bar. Oǵan debıtorlyq bereshek, qundy múlik, ınvestıtsııalyq altyn, múlik, avtorlyq quqyq, qolma-qol aqsha da kiredi.
«Deklaratsııany 2021 jyldyń 1 qańtarynan bastap deklaratsııany tapsyrýǵa mindetti adam 2020 jyldyń 31 jeltoqsanyndaǵy jaǵdaı boıynsha barlyq aktıvi men mindettemelerin kórsetýi tıis. Deklaratsııany naqty kim tapsyrady? 2021 jyldyń 1 qańtarynan bastap deklaratsııany jaýapty memlekettik qyzmetti atqaratyn adamdar jáne olardyń jubaılary, memlekettik fýnktsııalardy oryndaýǵa ýákiletti adamdar jáne olardyń jubaılary, memlekettik fýnktsııalardy oryndaýǵa ýákilettik berilgen adamdarǵa teńestirilgen adamdar jáne olardyń jubaılary tapsyrady. Odan bólek, bul sanatqa Konstıtýtsııalyq zańǵa, QR saılaý týraly jáne sybaılas jemqorlyqqa qarsy is-qımyl týraly, QR bankteri jáne banktik qyzmeti týraly, saqtandyrý qyzmeti týraly zańdarǵa sáıkes deklaratsııa tapsyrý mindeti júktelgen adamdar da kiredi», - dedi Dına Qusaıynova.
