Qazaqstanda 2020 jyly ınternettegi 73 myń destrýktıvti materıal buǵattalǵan
«Ulttyń jany men sanasyna nár beretin úlken faktorlardyń biri bul – árıne, din salasy. Biz – kóp konfessııaly memleketpiz. Elimizde 18 dinı baǵytta 3 848 birlestik resmı tirkelgen. Mine, mınıstrlik óz quzyreti sheginde olardyń árbirimen tyǵyz jumys istep keledi. Dese de, halqymyzda: «Din – ustaı alsań qasıetiń, ustaı almasań – qasiretiń» degen sóz bar. Onyń shynaıy mánin biz, ásirese, jastarǵa jetkizýge tyrysamyz. Bul rette, negizgi úsh baǵytty atap ótýge bolady. Birinshi – ınternettegi dinı ekstremızm ıdeologııasyna qarsy kúres, ekinshi – naqty maqsatty toptarmen aqparattyq-túsindirý júrgizý, úshinshi – jat dinı aǵym qurbandaryn ońaltý jumystary», - dedi mınıstr.
Aıda Balaeva radıkaldy dinı aǵymdar ıdeologııasy negizinen ınternet resýrstar arqyly taralatynyn atap ótti.
«Bul rette, ekstremıstik dinı aqparattyń aldyn alý maqsatynda ınternet jelilerine udaıy monıtorıng júrgiziledi. Byltyr osyndaı 73 myń destrýktıvti materıal buǵattalyp, BAQ men áleýmettik jeli arqyly 80 myńnan astam dinı aǵartý jumysy jarııalandy», - dedi ol.
Onyń atap ótýinshe, halyqqa sapaly dinı aqparat berý maqsatynda búginde 229 túsindirý-nasıhat toby jumys isteıdi.
«Joǵary saýatty, kásibı sarapshylardan turatyn úgit-nasıhat toby 1,5 mıllıon halyqty qamtyǵan 16 myńnan astam naqty aǵartý is-sharalaryn júrgizdi. Ásirese radıkaldy dinı aǵymdar yqpalyna túsý qaýpi joǵary naqty maqsatty toptarmen jumysqa basa mán berildi», - dedi ol.
