Qazaqstanda 2020 jyly 6 myńnan astam shaqyrym jol aqyly bolady
«Qazirgi ýaqytta respýblıkalyq avtomobıl joldaryn kútip ustaýǵa qajetti qarajat jetkilikti deńgeıde bólinip otyrǵan joq (qarjylandyrý normatıvteriniń tek 40 paıyzy). I jáne II tehnıkalyq sanattaǵy sapaly joldardy kútýge qajetti qarajat jetispeýshiligin azaıtý maqsatynda respýblıkada aqyly joldar júıesi kezeń-kezeńimen engizilýde. Qazaqstan Respýblıkasynyń 2020 jylǵa arnalǵan kóliktik ınfraqurylym júıesin damytý jáne yqpaldastyrý memlekettik baǵdarlamasy aıasynda 6 186 shyqyrym respýblıkalyq joldarǵa aqyly júıeni engizý josparlanýda», - dep jazady mınıstrlik.
Osy maqsattarǵa qol jetkizý úshin 2013 jyly qurylǵan jáne osy salada ulttyq operator bolyp tabylatyn «QazAvtoJol» UK» AQ respýblıkalyq joldarǵa aqyly júıeni engizý quzyryna ıe bolady.
«Osydan soń, ulttyq operator ınvestorlardy tartyp, aqyly júıeniń esebinen olardyń aldyndaǵy boryshty óteıtin bolady. Sonymen qatar III tehnıkalyq sattaǵy respýblıkalyq joldarda júk kólikterine aqyly júıe engiziledi dep kútilýde. Tájirıbe kórsetkenindeı, eń negizgi paıda kózi dál osy kólik túrlerinen túsedi», - delingen «QazAqparat» agenttigine berilgen habarlamada.
Aldaǵy 5 jylda «Nurly jol» baǵdarlamasy aıasynda mınıstrlik aldyna respýblıkalyq joldar qurylysy salasynda úlken mindetter qoıylǵan. Ulttyq operator osyǵan oraı memlekettik emes qaryzdar arqyly qosymsha qarajattar tartady.
«Joǵaryda aıtylǵan barlyq sharalar «Nurly jol» baǵdarlamasyndaǵy ınfraqurylymdyq jobalardy júzege asyrýǵa múmkindik beredi. Jańadan salynǵan joldardyń barlyǵy 2020 jyly aqyly júıeden túsken qarajat esebinen kútiletin bolady dep josparlanýda», - dep jazady vedomstvo.
Aıta keteıik, Elbasy óziniń 100 qadam Ult jospary reformalarynda jol-kólik ınfraqurylymdardyń qurylysyna sheteldik seriktesterdi tartýdy júktegen bolatyn.
