Qazaqstanda 2020 jylǵa deıin 1-shi tehnıkalyq sanattaǵy joldar 4 myń shaqyrymǵa jetkiziledi
ASTANA. 29 qazan. QazAqparat - Qazaqstanda 2020 jylǵa deıin 1-shi tehnıkalyq sanattaǵy joldar 4 myń shaqyrymǵa jetkiziledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Kólik jáne kommýnıkatsııa vıtse-mınıstri Mereke Pishembaev aıtty.
Onyń atap ótýinshe, respýblıka boıynsha 150 myń shaqyrymdaı joldar men kósheler bar. Onyń ishine respýblıkalyq, oblystyq jáne jergilikti joldarmen qatar qala kósheleri de kiredi. Jergilikti joldardy kútip ustaý ákimdikterdiń qaramaǵyna berilgen.
Vıtse-mınıstrdiń sózine qaraǵanda, elimizdiń avtomobıl joldaryn damytý baǵdarlamasynda joldardyń tehnıkalyq sanatyn kóterý kózdelgen. «Bizdiń avtomobıl joldaryn damytý baǵdarlamamyz boıynsha 2020 jylǵa deıin 1-shi tehnıkalyq sanattaǵy joldardy 4 myń shaqyrymǵa jetkizýdi kózdep otyrmyz. 2-shi sanattaǵy joldarǵa 7 200 shaqyrym qosylatyn bolady», - dedi ol.
