Qazaqstanda 2020 jyldyń úzdik shahmatshylary anyqtaldy
NUR-SULTAN. QazAqparat – Qazaqstan shahmat federatsııasynyń kezekti jyldyq sezine elimizdiń 14 oblysy men qalasynan 33 delegat kelip, 2020 jyldyń qorytyndysy jasaldy, dep habarlaıdy QazAqparat federatsııanyń baspasóz qyzmetine silteme jasap.
Qazaqstan shahmat federatsııasynyń prezıdenti Beıbit Atamqulov Federatsııanyń atqarýshy organdaryna jemisti eńbek etkeni úshin alǵys aıtty.
Lokdaýnǵa qaramastan Qazaqstan shahmat federatsııasy 2020 jyly 50 halyqaralyq jáne respýblıkalyq is-shara ótkizip, oǵan 3,5 myńnan asa kásipqoı jáne áýesqoı shahmatshy qatysty.
Federatsııa qurama múshelerine, ardagerler men jastarǵa qarjylaı qoldaý kórsetip, úzdik shahmatshylarǵa syıaqy taǵaıyndap otyrdy.
Bilim jáne ǵylym mınıstrligimen birlese otyryp Qazaqstan shahmat federatsııasy shahmatty synyptan tys qosymsha retinde engizý jumysyn júrgizip jatyr.
Dástúrli dene shynyqtyrý sabaǵymen qatar, qazaqstandyq mektep oqýshylarynyń shahmatpen aınalysýǵa múmkindigi bolady.
Qazaqstan shahmat federatsııasy halyqaralyq respýblıkalyq Almaty Online Chess Festival 2020 shahmat marafonyn ótkizdi. Bul búkil shahmat álemi úshin aıtýly oqıǵa boldy.
Jeltoqsanda Federatsııa joǵary uıymdasqan-sporttyq dárejede erler men áıelder arasyndaǵy chempıonatty ótkizdi.
Sezd kezinde ótken jyldyń úzdik shahmatshylarynyń aty ataldy. Áıelder arasynda 2020 jyldyń úzdik sportshysy - kadetter arasyndaǵy álem chempıonatynda kúmis medal jeńip alǵan 10 jasar Elnaz Qalıahmet.
Erler arasyndaǵy úzdik shahmatshy 65 jasqa deıingi ardagerler arasyndaǵy Azııa chempıonatynda jeńiske jetken Marat Pirimbetov boldy.
Qazaqstannyń erler quramasy Azııa ulttary kýbogynda 3-oryndy jeńip alyp, 2020 jyldyń úzdik komandasy atandy.
Federatsııanyń úzdik seriktesteri - Pavlodar jáne Aqtóbe oblystarynyń shahmat federatsııalary jáne Air Astana kompanııasy tanyldy.
Qazaqstan shahmatshylary 2020 jyly Álem, Eýropa jáne Azııa chempıonattarynda 4 altyn, 3 kúmis jáne 6 qola medalge qol jetkizdi.
Qazaqstandyq jastar 12 halyqaralyq matchtyń 11-inde jeńis tuǵyrynan kórinip, Azııa elderi komandalary arasynda eki halyqaralyq týrnırde jeńimpaz atandy.
