Qazaqstanda 2019 jyldan beri 511 jańa aýyl mektebi salynǵan
ASTANA. KAZINFORM – 2019-2026 jyldary elimizde 511 jańa aýyl mektebi paıdalanýǵa berildi. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda aıtty.
Onyń aıtýynsha, qazir Qazaqstandaǵy mektepterdiń 65 paıyzy aýyldyq jerde ornalasqan. Onda 1,5 mln-nan astam bala bilim alyp, 214 myń pedagog eńbek etedi. Bul barlyq oqýshylardyń 39%-y, al ustazdardyń 52%-y.
– «Pedagog mártebesi týraly» Zań muǵalimniń áleýmettik jaǵdaıyn túbegeıli ózgertti. Búgingi tańda aýyl pedagogtaryn qoldaý júıeli túrde jalǵasyp jatyr. Olarǵa 25% ústemaqy, «Dıplommen – aýylǵa!» baǵdarlamasy aıasynda kóterme járdemaqylar, jeńildetilgen turǵyn úı nesıesi, sonymen birge biliktilik sanatyna qaraı 50% deıingi qosymsha tólemder qarastyrylǵan, – dedi J.Súleımenova.
Jyl saıyn aýyl mektepteriniń kásibı damýyna erekshe kóńil bólinip keledi. «Úzdik pedagog» baıqaýynyń jeńimpazdarynyń 60%-y aýyl ustazdary.
– 2019 jyldan 2026 jylǵa deıin 511 jańa aýyl mektebi eksplýatatsııaǵa berildi. Onyń ishinde 84 «Keleshek mektepteri» bar. Nátıjesinde 32 apatty jáne 57 úsh aýysymdy mektep máselesi túbegeıli sheshildi. Bıyldyń ózinde 49 aýyl mektebi salynyp jatyr. 1300 mektep kúrdeli jóndeýden ótse, olardyń
820-sy aýyldyq mektepter ekenin erekshe atap óte alamyz. Bul jumystar bilim sapasynyń kóterilýine oń áser etip jatyr, – dep túsindirdi sala mınıstri.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy.
Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
