Qazaqstanda 2018 jyly eń kemi 45 telehıkaıa túsiriledi
BEIJІŃ. QazAqparat - 2018 jyly QR Aqparat jáne kommýnıkatsııalar mınıstrligi kemi 45 telehıkaıa túsirýdi josparlap otyr. Bul týraly aqparat jáne kommýnıkatsııalar vıtse-mınıstri Alan Ájibaev málim etti, dep habarlaıdy «QazAqparat» HAA-nyń Qytaıdaǵy menshikti tilshisi.
«2018 jyly QR Aqparat jáne kommýnıkatsııalar mınıstrligi kemi 45 telehıkaıa túsirýdi josparlap otyr. Bul teleónimder qytaılyq televızııalyq naryqqa da qyzyqty bolmaq», - dedi ol Beıjińde ótken Qytaıdyń 26-shy teleradıotaratý jelileriniń kontenti kórmesi aıasyndaǵy «Bir beldeý, bir jol» teleradıotaratý tehnologııasy men ǵylymynyń damýy» atty forým barysynda.
QazAqparat tilshisine bergen suhbatynda mınıstrdiń orynbasary qazaqstandyq serıaldardy shetel naryǵyna shyǵarý máselesi jóninde de pikir bildirdi.
«2017 jyly Qazaqstannyń ulttyq arnalary tarıhynda alǵash ret telehıkaıa ónimderin Ońtústik-Shyǵys Azııa elderine (Malaızııa men Indonezııa), Reseıge (Bashqurtstan jáne Tatarstan), Qyrǵyzstan, Ózbekstan jáne Monǵolııa elderine shyǵara bastadyq. Osylaısha televızııa tarıhynda alǵash ret telehıkaıa ónimderin satý arqyly tabys taptyq. Al Qytaı naryǵyna keletin bolsaq, «Áke» atty teleserıal bul eldiń ortalyuq telearnalarynyń praım-taım ýaqytyna engizildi», - dedi vıtse-mınıstr.
Eske sala keteıik, búgin QR Aqparat jáne kommýnıkatsııalar vıtse-mınıstri Alan Ájibaev qytaılyq BAQ ókilderin Astana Media Week jáne Azııalyq-Tynyqmuhıttyq habar taratý odaǵy (ABU) sharalaryna qatysýǵa shaqyrdy.
