Qazaqstanda 2018 jylǵa deıin tehnıkalyq mamandyqtar edáýir tapshy bolady - Eńbek mınıstri

ASTANA. QazAqparat - Qazaqstanda 2018 jylǵa deıin tehnıkalyq mamandyqtar edáýir tapshy bolady. Bul týraly búgin VII Astana ekonomıkalyq forýmynyń plenarlyq otyrysynda QR Eńbek jáne halyqty áleýmettik qorǵaý mınıstri Tamara Dúısenova málim etti.

«2018 jylǵa deıin bizdiń elimizde negizinen tehnıkalyq baǵyttaǵy mamandyqtar tapshy bolady», - dep atap ótti mınıstr.

Onyń aıtýynsha, ekonomıkany bilikti mamandyqtarmen qamtamasyz etý jáne bıznes pen kásiptik bilim berý mekemeleriniń arasynda baılanysty kúsheıtý maqsatynda eńbek naryǵynyń búgingi jaǵdaıyna baılanysty oqytýdyń jańa klassıfıkatory engizilmek.

Sonymen qatar mınıstrdiń atap kórsetkenindeı, bıyl shamamen 147 kásibı standarttar jasaldy.

«Byltyr 257 kásibı standart jasaldy. Jalpy 2020 jylǵa deıin ekonomıkanyń barlyq salalary boıynsha, 900-ge tarta kásibı standart engizý kózdelýde», - dep túıdi sózin T.Dúısenova.