Qazaqstanda 2018 jyldan bastap jańa formattaǵy ataýly áleýmettik kómek engiziledi - T. Dúısenova

ASTANA. QazAqparat - 2018 jyldyń 1-qańtarynan bastap elimizde jańa formattaǵy ataýly áleýmettik kómekter engiziledi. Búgin Parlament Májilisiniń jalpy otyrysynda Densaýlyq saqtaý jáne áleýmettik damý mınıstri Tamara Dúısenova osylaı málimdedi. Eske sala keteıik, jalpy otyrysta «Qazaqstan Respýblıkasynyń keıbir zańnamalyq aktilerine halyqty áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn.

«Búgingi kúni kópbalaly jáne az qamtylǵan otbasylarǵa respýblıkalyq bıýdjetten tabysyna qaramastan arnaýly járdemaqy beriledi. Al jergilikti bıýdjetten jan basyna shaqqanda kúnkóris deńgeıiniń 60 paıyzynan tómen bolsa tek otbasyndaǵy balalarǵa, al 40 paıyzdan tómen bolsa jan basyna beriletin ataýly áleýmettik kómekter qamtylǵan. ıAǵnı, ataýly áleýmettik kómek túrleriniń kóptigi, olardy taǵaıyndaýǵa qarastyrylǵan sharttar, árqaısysyn alýǵa qajetti qujattar toptamasy, olardy ortalyq atqarýshy organdarǵa tapsyrý sekildi jumystar memelket usynatyn ataýly áleýmettik kómekti kúrdelendirip, ıkemsiz júıege aınaldyrdy», - deıdi mınıstr Tamara Dúısenova.

Onyń aıtýynsha, Ekonomıkalyq yntymaqtastyq uıymyna kiretin memleketter tájirıbesin eskere otyryp, zań jobasynda joǵaryda kórsetilgen úsh áleýmettik tólemniń ornyna otbasynyń tabysyna sáıkes beriletin jańa formattaǵy ataýly áleýmettik kómekti taǵaıyndaý kózdeledi.

Mınıstrdiń sózine qaraǵanda, zań jobasynda ataýly áleýmettik kómekter buǵan deıin berilip kelgen mólsherden kem bolmaýy úshin kedeıshilik sheginiń 40 paıyzynan 50 paıyzǵa qaraı kóterilmek. «Bul rette ataýly áleýmettik kómek árbir otbasy múshesine taǵaıyndalatyn bolady. Alýshylar bir ǵana paket qujattardy tek jergilikti organǵa ǵana tapsyrady», - deıdi T. Dúısenova.

Onyń sózine qaraǵanda, jańa formattaǵy ataýly áleýmettik kómektiń taǵy bir ereksheligi eger otbasyndaǵy azamattar eńbek etýge qabiletti bolsa, onda kómek áleýmettik jumys usyný aıasyndaǵy kelisimshart negizinde jasalady. Bul rette otbasynyń eńbek etýge qabiletti músheleri jumyspen qamtýdyń belsendi sharalaryna qatysýǵa mindetti bolady. Eger eńbek etýge qabiletti azamattar mundaı sharalardan bas tartatyn bolsa, onda ataýly áleýmettik kómek tek otbasyndaǵy balalarǵa ǵana taǵaıyndalatyn bolady. «Zań jobasyna sáıkes, otbasy quramynda eńbekke qabiletti músheleri bolmaǵan nemese olar belgili sebepterge baılanysty jumys isteı almaıtyn bolsa, onda ondaı otbasylarǵa ataýly áleýmettik kómek kelisimshartsyz tabystyń mólsherine qaraı taǵaıyndalady», - dedi mınıstr.

Mınıstrdiń aıtýynsha, bul ózgeristerdi 2018 jyldyń 1-qańtarynan bastap qoldanysqa engizý kózdeledi. Bul rette jańa formattaǵy áleýmettik kómekter úshin 2016-2018 jyldarǵa arnalǵan respýblıkalyq bıýdjet jobasynda 11,8 mlrd teńge qarastyrylǵan.