Qazaqstanda 2017 jyly zańǵa qaıshy keletin 2,5 myń ınternet-resýrs anyqtalǵan
Vedomstvonyń aqparatyna sáıkes, 2017 jyly Din isteri jáne azamattyq qoǵam mınıstrliginiń mamandary ǵalamtordaǵy 5527 aqparat resýrstaryna zertteý júrgizgen. Zertteý qorytyndylaryna sáıkes, olardyń ishinde 2487 zańsyz materıaldardyń bar ekendigi anyqtalǵan. Zańbuzýshylyqtar anyqtalǵan saıttar boıynsha jasalǵan saraptamalyq qorytyndylar - QR Aqparat jáne kommýnıkatsııalar mınıstrligine atalǵan saıttardy buǵattaý jáne tıisti tehnıkalyq sharalardy qabyldaý úshin jiberildi.
Din isteri jáne azamattyq qoǵam mınıstrligi dinı ádebıetter jáne ózge de dinı mazmundaǵy materıaldar men nysandarǵa dinı saraptama júrgizdi. Atap aıtqanda, 2017 jyly 3495 materıal dinı saraptamadan ótip, onyń ishinde 179 nysannyń zań buzýshylyq baǵyttaǵy qyzmeti anyqtalǵan.
Dinı saraptama júrgizýdiń negizgi mindeti - Konstıtýtsııa normalary men Qazaqstan Respýblıkasynyń zańnamasyna, azamattardyń quqyqtary men bostandyqtaryna teris áser etetin zańbuzýshylyqtardy anyqtap, olarǵa saraptama júrgizý bolyp tabylady.
Qazaqstan Respýblıkasynyń zańnamasyna qaıshy keletin materıaldar anyqtalǵan jaǵdaıda dinı saraptama júrgizý erejelerine sáıkes, ony respýblıka aýmaǵynda paıdalanýǵa jáne taratýǵa ruqsat etilmeıdi.
Qazirgi ýaqytta dinı qyzmetti retteıtin zańnamaǵa túzetýler engizý jónindegi qujattar ázirlendi. Onyń negizinde 9 Zańǵa jáne 2 Kodekske jalpy sany 52 túzetýler engizý qarastyrylyp otyr.
Qazaqstan Respýblıkasy Din isteri jáne azamattyq qoǵam mınıstrliginiń baspasóz qyzmetiniń málimetine sáıkes, atalǵan Zań jobasynda ata-analar nemese kámeletke tolmaǵandardyń basqa da zańdy ókilderiniń tálim-tárbıe berý maqsatynda paıdalanatyn ádebıetter men materıaldaryn, sondaı-aq, dinı bilim berý uıymdarynda resmı túrde oqıtyn balalarǵa taratylatyn ádebıet pen materıaldardy qospaǵanda, 16 jasqa tolmaǵan jasóspirimderge dinı ádebıetterdi, dinı mazmundaǵy aqparattyq materıaldardy taratýǵa tyıym salynatyn norma usynylǵan.
