Qazaqstanda 2017 jyly bankter tólemderdi kúnbe-kún oryndaýǵa kóshetin bolady - Ulttyq bank
ASTANA. QazAqparat - 2017 jyldyń 1 maýsymynan bastap, elimizdiń bankteri tólem aýdarymdaryn kúnbe-kún atqarýǵa kóshetin bolady. Búgin Májilistiń jalpy otyrysynda QR Ulttyq bankiniń tóraǵasy Danııar Aqyshev osylaı málim etti. Otyrysta «Tólemder men tólem júıesi týraly» zań jobasy birinshi oqylymda talqylanǵan bolatyn.
«Zań jobasy bankterdiń tólem agentteri jelisi arqyly tólem qyzmetteriniń belgili bir qyzmetterin kórsetý múmkindigin kózdeıdi. Bul halyq úshin bazalyq banktik qyzmetterdiń qoljetimdiligin arttyrýǵa múmkindik beredi. Budan bólek, tólemder men aqsha aýdarymdaryn júzege asyrý tártibi aıqyndalady. Bul rette tólem quraldary, tólemder men aqsha aýdarymdaryn júzege asyrý tásilderi men negizgi rásimderi aıqyndalyp otyr. Osyǵan baılanysty zań jobasynda bank protsessterin jaqsartatyn jáne tólemderdi jasaý tásilderin keńeıtetin quqyqtyq normalar qamtylǵan», - dedi D. Aqyshev.
Onyń aıtýyna qaraǵanda, qujatta tólem qyzmetterin tutynýshylardyń múddelerin qorǵaý normalary da qamtylyp otyr. Atap aıtqanda, bankterde tólemderdi oryndaý merzimi qysqartylady. Bul rette tólemderdi oryndaý merzimi eń kóbi tórt kúnnen eki kúnge qysqarsa, al 2017 jyldyń 1 maýsymynan bastap tólemder kúnbe-kún atqarylatyn bolady.
«Sonymen qatar, tulǵalardyń talaptary boıynsha bank shottarynan járdemaqylar men áleýmettik tólemderdi alý barysynda turǵyn úı tólemderin óndirip alýǵa shekteý engiziledi. Bankter tarıfteriniń aıqyndylyǵy qamtamasyz etiledi. Máselen, olardyń klıentti tólem operatsııasyn jasaǵanǵa deıin komıssııanyń mólsherimen tanystyrý mindeti engizilip, sondaı-aq birjaqty tarappen sharttyń talaptaryn, tarıfterdi ulǵaıtýǵa tyıym salynady», - dedi Bas bankır.
