Qazaqstanda 2017 jyldan bastap fýtbol alańdary sertıfıkattaýdan ótetin bolady - QFF
ASTANA. QazAqparat - Qazaqstanda 2017 jyldan bastap fýtbol alańdary sertıfıkattaýdan ótetin bolady. Qazaqstan fýtbol federatsııasynyń prezıdenti Erlan Qojaǵapanov Almatyda fýtbol qaýymdastyǵymen kezdesý barysynda osylaı málimdedi. Sonymen qatar, kezdesýde fýtboldyń búgingi jaǵdaıy talqylanyp, balalar men jasóspirimder oıynyn damytý máseleleri sóz boldy. Bul týraly federatsııanyń baspasóz qyzmetinen habarlandy.
«Biz úshin balalar men jasóspirimder fýtbolyn damytý birinshi kezektegi basymdyq bolyp tabylady. Óıtkeni, sporttyń osy túriniń negizgi ózegi jas oıynshylardy qalyptastyrý arqyly, olardyń sheberlikterin shyńdaý arqyly jetile túspek. Sonymen qatar, ınfraqurylymdy jaqsartpaı fýtboldy damytý týraly áńgime aıtý beker. Sondyqtan da, Federatsııa sapaly fýtbol alańdarynyń sanyn arttyrýǵa kómek beretin bolady», dedi E. Qojaǵapanov.
Onyń aıtýyna qaraǵanda, aldaǵy ýaqytta elimizdegi fýtbol alańdary men stadıondarǵa talap satylap kúsheıtile túspek. Bıylǵy jyldyń ózinde Premer Lıga alańdarynyń barlyǵy aýdıtten ótkiziledi, buǵan sheteldik mamandar da tartylyp otyr.
«2017 jyldan bastap barlyq alańdar sertıfıkattaýdan ótetin bolady. Sapasyz alańdarda endi matchtar ótkizbeıtin bolamyz», - dedi Erlan Qojaǵapanov.
Budan bólek, Federatsııa basshysynyń aıtýynsha, Qazaqstanda balalar men jasóspirimder fýtbolynan ótý reglamentteri jasalyp, óńirlik federatsııalar qyzmeti jetildirile túsetin bolady. Sosyn balalar jattyqtyrýshylarynyń reıtıngi ázirlenedi, soǵan qaraı yntalandyrý kestesi de qabyldanbaq. Sonym en qatar, el fýtbolyn damytý úshin halyqaralyq yntymaqtastyqqa da barynsha nazar aýdarylady.
«Fýtbol áleminde Qazaqstannyń ımıdjin kóterý maqsatynda biz elimizde mańyzdy fýtbol dodalaryn ótkizýge kúsh salamyz. Qazirdiń ózinde Astanada 2018 jyly Eýropa Sýperkobogyn ótkizýge ótinim berildi. Qazaqstanda 2017-2018 jyldary qyzdar arasyndaǵy U-17 jáne U-19 Eýropa Chempıonatyn ótkizýge ótinim ázirlenip jatyr»,- dedi ol.
