Qazaqstanda 2016 jyly sanavıatsııa 1,4 myńnan astam ushyrylym jasady

ASTANA. QazAqparat - Aǵymdaǵy jylǵy 8 aıda QR DSÁDM Respýblıkalyq sanıtarlyq avıatsııa brıgadalary 1408 ushyrylym jasap, 1740 medıtsınalyq qyzmet kórsetti. Onyń ishinde 1365 naýqas tasymaldanyp, 289-ine keńes berildi jáne 86 ota jasaldy, dep habarlady www.pm.kz.

Tasymaldanǵan patsıentterdiń 70%-y oblystyq jáne qalalyq medıtsınalyq uıymdarǵa, 30%-y Astana jáne Almaty qalalaryndaǵy respýblıkalyq ortalyqtarǵa jatqyzyldy.

Atalǵan merzim ishinde sheteldik emhanalar men medıtsınalyq uıymdardaǵy QR azamattary-patsıentterin Astana jáne Almaty qalalaryna emdeý sharalaryn jalǵastyrý úshin Pýsan (Ońtústik Koreıa), Tsveıbrıýken (Germanııa), Antalııa (Túrkııa), Izmır (Túrkııa), Praga (Chehııa), Bishkek (Qyrǵyzstan), Máskeý (Reseı) qalalarynan 7 ushyrylym jasalyp, tasymaldandy.

Sanıtarlyq avıatsııanyń mobıldik brıgadalary balalar jasyndaǵy patologııa, jaraqattanýshylyq, qaıǵyly oqıǵalar jáne ýlanýlar, akýsherlik-gınekologııalyq patologııalar, qan aınalymy júıesi aýrýlary, jańa týǵan nárestelerdiń patologııalary jáne ózge de aýrýlar boıynsha medıtsınalyq kómek kórsetti.

Sonymen birge, 2016 jyldyń 8 aıynda sanıtarlyq avıatsııanyń mobıldik brıgadalary ártúrli jaraqat alǵan 425 patsıentke, onyń ishinde jol-kólik apatynan zardap shekken 180 adamǵa medıtsınalyq kómek kórsetti.