Qazaqstanda 2016 jylǵa boljanǵan JІÓ-niń ósimi 2,1 paıyzdan 0,5 paıyzǵa deıin tómendedi - E.Dosaev
ASTANA. QazAqparat - Qazaqstanda 2016 jylǵa boljanǵan jalpy ishki ónimniń ósimi 2,1 paıyzdan 0,5 paıyzǵa deıin tómendedi. Bul týraly Úkimet otyrysynan keıin jýrnalısterge Ulttyq ekonomıka mınıstri Erbolat Dosaev málim etti.
«Úkimettiń aldyńǵy otyrysynda elimizdiń 2016 jylǵa arnalǵan áleýmettik-ekonomıkalyq damýynyń jańa boljamyn bekittik. Sondyqtan, myna parametrlerdiń ózgerisi boljanyp otyr. Birinshiden, kýrsty ótken jyldyń qarashasynda bekitilgen 300 teńgeden 360 teńgege ózgertemiz. Munaıdyń jyldyq ortasha baǵasyn ózgertemiz, ony halyqaralyq qarjy uıymdarynyń, ınvestıtsııalyq bankterdiń, munaı men gaz salasyndańy sarapshylardyń boljamyna saı, bir barrel munaıdyń baǵasyn 40 dollardan 30 dollarǵa tómendetemiz. Osyǵan baılanysty, biz ekonomıkanyń ósimine baılanysty boljamdy da ózgertemiz. Eger, esterińizde bolsa, bir barrel munaıdyń baǵasy 40 dollar dep alǵan kezde, jalpy ishki ónimniń ósimi 2,1 paıyz bolady dep boljaǵan edik, al konservatıvti stsenarıı boıynsha, bıyl jalpy ishki ónimniń ósimi (bir barrel munaıdyń baǵasy 30 dollar dep boljanǵanda) 0,5 paıyzdy quraıdy dep boljap otyrmyz. Bizdiń ekonomıka áli de jaǵymdy aýmaqta», - dep túsindirdi E.Dosaev.
Mınıstrdiń aıtýynsha, 2016 jyly ınflıatsııa deńgeıi burynǵy 6-8 paıyz korıdorynda saqtalady. Taý-ken baıytý ónerkásibindegi óndiris kólemi 5 paıyzǵa, óńdeýshi ónerkásiptegi óndiris kólemi 1,4 paıyzǵa azaıady dep kútilýde. Al aýyl sharýashylyǵy salasyndaǵy óndiris 3,5 paıyzǵa óspek.
