Qazaqstanda 2015 jyldan bastap ókpe qabynýyna qarsy ekpe egý respýblıka boıynsha júrgiziledi
ASTANA. 5 tamyz. QazAqparat - Qazaqstanda 2015 jyldan bastap ókpe qabynýyna (pnevmonııa) qarsy vaktsınalaý respýblıka boıynsha júzege asa bastaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Densaýlyq saqtaý mınıstrligi Memlekettik sanıtarlyq-epıdemıologııalyq baqylaý komıtetiniń tóraǵasy Jandarbek Bekshın málimdedi.
Bas sanıtar dárigerdiń aıtýynsha, Qazaqstanǵa uzaq jyldar boıy ekpe dárileri tek Dúnıejúzilik densaýlyq saqtaý uıymynyń sertıfıkattaýy arqyly ǵana jetkizilip keldi. Sonymen qatar, 2006 jyldan bastap elimizde ulttyq referens-zerthanalar ashylyp, bul oryndarda vaktsınalardyń sapasy men qaýipsizdigi qadaǵalandy. Al 2013 jyldan bastap tipti Dúnıejúzilik densaýlyq saqtaý uıymynyń sertıfıkattaǵan ekpeleri de Qazaqstannyń ulttyq testileýinen ótip keledi.
«2014 jyldan bastap ókpe qabynýyn qozdyrýshy bakterııalarǵa qarsy ekpe elimizdiń Aqtóbe, Pavlodar oblystary men Almaty qalasynda júzege asady. 2015 jylǵa qaraı bul ınfektsııaǵa qarsy ekpe búkil respýblıka boıynsha jasalady», - deı kele Bas sanıtar dáriger balalarǵa ekpe egýden bas tartý týraly ata-analar áreketinen bolatyn saldardy da eskertti.
«1995 jyly eldi tapshylyq jaılaǵan tusta vaktsına satyp alýǵa qarajat ta bolmady, sonyń saldarynan elimizde dıfterııa (balalardyń juqpaly tamaq aýrýy) burq etti. Myńnan astam adam japa shegip, 66 ólim jaǵdaıy tirkeldi. 2005 jyly 90-y jyldardaǵy jaǵdaı qaıtalandy. Eresek azamattar, jasóspirimderge de ekpe jasalmaǵan bolatyn, sonyń saldarynan 16 myń adam qyzylsha shyǵyp aýyrdy. Mine, osynyń barlyǵy ekpege degen eskertýdi eleń qylmaǵandyqtan týyndaǵan», - deıdi J.Bekshın.
Onyń aıtýynsha, balalarǵa arnalǵan gemofıldik jáne ókpeniń qabynýyn týdyratyn bakterııalarǵa qarsy ekpe balalar ónimin tómendetedi. Toqtala ketetin jaıt, búgingi kúni Qazaqstandaǵy bala ólimi qurylymynda tynys alý organy aýrýlarynan bolatyn ólim-jitim 3-shi orynda tursa, onyń ishinde 60 paıyzy ókpe qabynýynan bolatyn ólimderge keledi.
