Qazaqstanda 2015-2019 jyldarǵa arnalǵan Mıneraldy-shıkizat keshenin damytý baǵdarlamasy jasalady
ASTANA. 5 sáýir. QazAqparat - 2013 jyly Qazaqstannyń 2015-2019 jyldarǵa arnalǵan mıneraldy-shıkizat keshenin damytýdyń salalyq baǵdarlamasy jasalady. Bul týraly Indýstrııa jáne jańa tehnologııalar mınıstrliginiń Geologııa jáne jer qoınaýyn paıdalaný komıtetiniń tóraǵasy Bazarbaı Nurabaev aıtty, dep habarlady primeminister.kz.
«2013 jylǵa Komıtettiń negizgi maqsaty Qazaqstannyń 2015-2019 jyldarǵa arnalǵan mıneraldy-shıkizat keshenin damytýdyń salalyq baǵdarlamasyn jasaý bolyp tabylady», - dedi B.Nurabaev.
Atalǵan baǵdarlama 2030 jylǵa deıin geologııalyq salany damytý tujyrymdamasyn júzege asyrý aıasynda jasalady. 2015-2019 jyldarǵa arnalǵan salalyq baǵdarlamanyń mazmunyna óńirlik, izdeý, izdeý-baǵalaý jáne izdeý-barlaý sııaqty 040 baǵdarlamasy boıynsha bıýdjettik jumystar enedi.
Sonymen qatar, 2015-2019 jyldarǵa arnalǵan baǵdarlamaǵa qosymsha eki blok engizý kútilýde, Komıtet basshysynyń aıtýynsha, atalǵan bloktar boıynsha jumystardy iske asyrý birqatar máselelerdiń sheshilgenin talap etedi, áıtpese josparlanǵan jumystar durys oryndalmaıdy jáne tıimsiz bolady.
B.Nurabaev aıtyp ketkendeı, zamanaýı zerthanasyz geohımııalyq zertteýler jasalmaıdy, qolaıly ınvestıtsııalyq ahýal qalyptaspaıynsha memlekettik-jekemenshiktik seriktestik damymaıdy.
Aıta ketý kerek, salalyq baǵdarlamada úsh blok paıdaly qazbalar qorynyń ornyn toltyrýǵa baǵyttalǵan bir-birin tolyqtyratyn komponent bolyp esepteledi. Memlekettik-jekemenshik seriktestiktiń blogyn tolyqqandy damytqan jaǵdaıda ınvestıtsııa kólemi men alynatyn nátıjeler bıýdjettik jumystardyń uqsas kórsetkishteri artýy múmkin.
