Qazaqstanda 2014 jyly qylmys deńgeıi 5,2% tómendedi - QR Bas prokýratýrasy

ASTANA. QazAqparat - 2014 jyldyń ishinde Qazaqstanda burnaǵy jyldyń osy kezeńimen salystyrǵanda tirkelgen qylmystardyń deńgeıi 5,2% (359 844-ten 341 291-ge deıin) tómendedi. Bul týraly QR Bas prokýratýrasynyń Quqyqtyq statıstıka jáne arnaıy esep komıteti habarlady.

Tómendeý qylmystyń barlyq túrinde boldy, sonyń ishinde asa aýyr qylmystar 18,2% (2629-den 2150-ge deıin), aýyr qylmystar boıynsha 17,4% (33 836-den 27 941-ge deıin), ortasha aýyr qylmystar boıynsha 2,8% (279 389-dan 271 592-ge deıin), asa aýyr emes qylmystar boıynsha 10% (43 990-nan 39 608-ge deıin) azaıdy.

Qylmystyń aldyn alý jónindegi memlekettik organdardyń is-qımyldaryn úılestirý eldegi jasalatyn qylmystardyń 72 paıyzdan astamyn quraıtyn urlyq (1,5%), sonyń ishinde páter urlyǵy (2,9%), buzaqylyq (15%), tonaý (24%) sııaqty qylmystyń negizgi qurylymyn tómendetýge múmkindik berdi.

Alkogoldik jáne esirtki áserinen mas bolý jaǵdaıynda jasalatyn qylmys 4,3%-ǵa, kámeletke tolmaǵandar qylmysy 16,9%-ǵa, kóshe qylmysy 10,5%-ǵa, retsıdıvtik qylmys 7,2%-ǵa tómendedi. Álemde naqty qylmystyq ahýaldy baǵalaıtyn ındıkatorlar da tómendegeni baıqalady.

Máselen, kisi óltirý 19,3%-ǵa, qarashylyq 29,7%-ǵa, bopsalaý19,2%-ǵa tómendegen.