Qazaqstanda 2014 jyly elektrondyq úkimet jónindegi Ǵalamdyq forým ótedi
ASTANA. 24 qazan. QazAqparat - Qazaqstan Respýblıkasynyń Kólik jáne kommýnıkatsııa mınıstrligi men Koreıa Respýblıkasynyń Qorǵanys jáne memlekettik basqarý mınıstrligi Elektrondyq úkimettiń 2013 jylǵy Ǵalamdyq forýmynyń jumysy barysynda elektrondyq úkimetti damytý salasyndaǵy áriptestikti nyǵaıtý týraly kelisti. Bul týraly Kólik jáne kommýnıkatsııa mınıstrliginiń baspasóz qyzmetinen habarlady.
Eki el arasyndaǵy áriptestikti nyǵaıtý týraly qujatqa qol qoıyldy. Atalǵan qujatta taraptardyń E -úkimet salasynda ózara tájirıbe almasyp, bilimderimen bólisýi, sondaı-aq semınarlar men dóńgelek ústelderdi birlese uıymdastyrýy, birlese jumys isteýdiń jańa múmkindikterin zerdeleý jáne elektrondyq úkimet jónindegi Ǵalamdyq forýmdy ótkizýde ózara tyǵyz qarym-qatynas ornatý kózdelgen.
Qazaqstan Respýblıkasyndaǵy elektrondyq úkimet jobasynyń qarqyndy túrde damýyna, sondaı-aq Aqparattyq kommýnıkatsııalyq tehnologııalar jónindegi halyqaralyq reıtıngide Qazaqstannyń joǵary kórsetkishke ıe bolýyna oraı Birikken Ulttar Uıymy Elektrondyq úkimet jónindegi Ǵalamdyq forýmdy 2014 jyldyń qazan aıynda Qazaqstanda uıymdastyrý týraly sheshim shyǵardy.
Alǵashqy forým 2012 jyly Seýlde ótti.
Álemniń 40 elinen jınalǵan 100-den astam qatysýshy Ońtústik Koreıa eliniń astanasynda bas qosyp, jańa aqparattyq dáýirdegi elektrondyq úkimettiń roli men jańa úrdisterdi talqylaýǵa salyp, ózara pikir almasty. Basty taqyryp - «Aqyldy úkimet jáne qoǵam: ashyqtyq, pikir almasý, kommýnıkatsııa jáne áriptestik».
