Qazaqstanda 2013 jylǵa qaraı temir jetispeýshiligi anemııasymen aýyratyndar sany edáýir tómendeıdi

dep habarlaıdy vedomstvonyń baspasóz qyzmeti.

 Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń negizgi mindetteriniń biri azamattardyń reprodýktıvtik densaýlyǵyn nyǵaıtý jáne ana men bala densaýlyǵyn qorǵaý bolyp tabylady. Osy baǵytta bastapqy medıtsınalyq-sanıtarııalyq kómek deńgeıinde kórsetiletin medıtsınalyq járdemniń jáne Dúnıejúzilik densaýlyq saqtaý uıymynyń halyqaralyq standarttaryna saı mamandandyrylǵan kómektiń qoljetimdiligi men sapasyn arttyryp, sabaqtastyǵyn qamtamasyz etýdi qarastyrady.

Respýblıkada qan organdary aýrýlary ishinde anemııa aldyńǵy qatarda tur. 

 Temir jetispeýshiligi anemııasy naýqastardyń ómir sapasyna áser etip, eńbekke qabilettiligin tómendetedi jáne kóptegen organdar men júıelerdiń fýnktsıonaldyq buzylýyna ákep soǵady. Júkti áıelderde temir jetispeýshiliginiń bolýy bosanǵan kezde asqynyp, ýaqytyly jáne tıisti terapııa jasalmasa, ishtegi sábı de temir jetispeýshiligi dertine shaldyǵady. Sondyqtan, profılaktıkalyq is-sharalar eń aldymen aǵzadaǵy temirdiń ornyn tolyqtyrýǵa baǵyttalady. Temir jetispeýshiligi anemııasyn emdeýge qajetti shart dáriger taǵaıyndaǵan dárilik temir preparattaryn qoldaný bolyp tabylady. Osyǵan baılanysty «Salamatty Qazaqstan» memlekettik baǵdarlamasynda  perınataldyq medıtsınany ári qaraı damytý, akýsherlik-gınekologııalyq jáne pedıatrııalyq qyzmetterdiń ózara baılanysyn, dárilik quraldarmen qamtamasyz etýdi jaqsartý josparlanǵan.

 «Halyq densaýlyǵy jáne densaýlyq saqtaý júıesi týraly» QR Kodeksine sáıkes 2011 jyldyń qarasha aıynda «Tegin medıtsınalyq kómektiń kepildendirilgen kólemi sheńberinde ambýlatorlyq deńgeıde belgili aýrýlar (jaǵdaılar) boıynsha halyqty tegin qamtamasyz etýge arnalǵan dárilik quraldar jáne medıtsınalyq maqsattaǵy buıymdar tizimin bekitý týraly» Densaýlyq saqtaý mınıstriniń buıryǵy shyqty.

 Turǵyndardy ambýlatorlyq deńgeıde temir, askorbın, folı qyshqyly preparattarymen tegin qamtamasyz etý, túrli jastaǵy balalardyń, reprodýktıvti jastaǵy, júkti jáne bala emizetin áıelderdiń tamaqtanýyn jaqsartý, erte dıagnostıkalaý (profılaktıkalyq tekserýler, júkti áıelder skrınıngi) jáne QR Densaýlyq saqtaý mınıstrligi atqaryp jatqan ózge de sharalar 2013 jylǵa qaraı temir jetispeýshiligi anemııasymen aýyratyndar sanyn 100 myń adamǵa shaqqanda 1940,4-ke azaıtýǵa múmkindik beredi. 2011 jyldyń aldyn ala qorytyndylary boıynsha atalǵan kórsetkish 100 myń adamǵa shaqqanda 2165,0-ti qurady.