Qazaqstanda 2011 jyly áleýmettik nysandar men kóppáterli turǵyn úılerdiń energoaýdıtine 360 mln. teńge bólinedi

Bul týraly búgin elordada ótken baspasóz máslıhatynda QR Qurylys jáne turǵyn úı- kommýnaldyq sharýashylyq isteri agenttigi departamentiniń dırektory Vasılıı Maslov málim etti.

«Kommýnaldyq sektordyń energııalyq tıimdiligin arttyrý maqsatynda áleýmettik nysandardyń, atap aıtqanda mektepter, aýrýhanalar men balabaqshalardyń, sondaı-aq kóppáterli turǵyn úılerdiń aýdıtin jasamaqpyz. Ol úshin 2011 jyly áleýmettik nysandarǵa - 150 mln., al turǵyn úı sektoryna - 210 mln. teńge baǵyttalady», - dedi V.Maslov.

Onyń sózine qaraǵanda, bul sharalar ústimizdegi jyldyń qyrkúıek aıynda Úkimet maquldaǵan 2020 jylǵa deıingi Turǵyn úı-kommýnaldyq sharýashylyǵyn jańǵyrtý salalyq baǵdarlamasy aıasynda iske asyrylatyn jumystardyń tek alǵashqy kezeńi ǵana.

Onymen birge, 2011 jyly bıýdjettik qarajattar esebinen 9 óńirde avtomattandyrylǵan jylý pýnktterin (AJP) ornatý boıynsha 114 ilki joba iske asyrylatyn bolady.

V.Maslovtyń aıtýynsha, AJP-nyń tıimdiligi dáleldengennen keıin, 2012 jyldan bastap jergilikti atqarýshy organdar olardy áleýmettik nysandarǵa ózderi ornatady. Al kóppáterli turǵyn úıdiń ıeleri qurylǵylardy óz qarajattaryna satyp alady. Qazirgi baǵalar boıynsha mundaı avtomatty qurylǵy 3 mln. teńgeniń mańaıynda turady. Osymen birge V.Maslov, memleket kondomınımým nysandaryn AJP-ny ornatýǵa májbúrlemeıtindigin aıtty, olardyń jumystary qurylǵynyń tıimdiligin dáleldeýge baǵyttalatyn bolady.

Sondaı-aq Agenttik ókili baǵdarlama aıasynda nysandardy jóndeý jáne túrlendirý jumystaryna júıeli túrde kirisý úshin kommýnaldyq jelilerdiń tehnıkalyq jaǵdaıyn baǵalaýǵa jyl saıyn respýblıkalyq bıýdjetten 250 mln. teńge bólinetindigin aıtty. Sebebi, naqty osy máselede respýblıkalyq shyǵyndar kóp bolyp otyr.