Qazaqstanda 2011 jyly 8 myńnan astam kardıohırýrgııalyq operatsııa jasaldy
ASTANA. 2 sáýir. QazAqparat - Densaýlyq saqtaýdy damytýdyń «Salamatty Qazaqstan» memlekettik baǵdarlamasyn iske asyrý aıasynda elimizdiń barlyq óńirinde kardıohırýrgııalyq qyzmetti damytý jónindegi tıimdi sharalar qabyldanýda.
Qazaqstan ashyq júrekke biregeı joǵary tehnologııalyq operatsııalar jasaýshy álemniń eń damyǵan 22 eliniń qataryna kirip otyr, dep habarlady pm.kz saıty.
«Búginde «Salamatty Qazaqstan-2015» memlekettik baǵdarlamasy júzege asyrylýda. Densaýlyq saqtaý júıesi sapaly damyp keledi. Halyq densaýlyǵy kórsetkishteriniń jaqsy serpindiligine qol jetkizildi. Bala týý ósip, ómir súrý uzaqtyǵy ulǵaıdy. Qan aınalý júıesi aýrýlarynan bolatyn ólim kórsetkishi 1,7 esege tómendedi», - dedi Elbasy N.Á.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýynda.
Densaýlyq saqtaý mınıstrliginiń aqparaty boıynsha, qazirgi tańda elimizdiń óńirlerinde 26 medıtsınalyq uıym halyqqa kardıohırýrgııalyq qyzmet kórsetýde. Olar 2011 jyly júrekke 8 myńnan astam operatsııa jasady, onyń ishinde 6,5 myńǵa jýyǵy - ashyq júrekke jasalǵan operatsııalar.
Oǵan qosa, elimizde júrekke ınvazıvti tekserý júrgizýdi qarastyratyn koronaroangıografııa jasaýǵa arnalǵan 22 kabınet jumys isteıdi. 2011 jyly elimizde 9543 astam osyndaı tekserý júrgizilgen.
Aıta ketý kerek, «Salamatty Qazaqstan» baǵdarlamasynyń aıasynda elimizde negizgi áleýmettik-mańyzdy aýrýlardy, onyń ishinde qan aınalymy júıesiniń aýrýlaryn erte anyqtaý maqsatynda Ultty skrınıngilik baǵdarlama engizilip otyr. Oǵan qosa, qan aınalymy júıesiniń aýrýlaryn halyqaralyq standarttarǵa sáıkes dıagnostıkalaý men emdeýdiń tıimdi tehnologııalary engizilýde, oblystyq jáne qalalyq aýrýhanalardyń jandarynan 8 ınsýlt ortalyǵy ashyldy. 2012 jyldyń sońyndaǵy jaǵdaı boıynsha elimizde mundaı taǵy 16 ortalyq ashylsa, 2013 jyly taǵy 24 ortalyq ashylmaq.
Sonymen birge kardıologııalyq kómek kórsetýshi densaýlyq saqtaý mekemeleriniń materıaldyq-tehnıkalyq bazalary nyǵaıtylýda. Bul maqsattarǵa 2011-2015 jyldarǵa arnalǵan respýblıkalyq bıýdjette ınterventsııalyq kardıologııany damytýǵa 5,2 mlrd. teńge, bastaýysh medıtsına-sanıtarlyq kómekti uıymdastyrý úshin kardıologııalyq jabdyqtar satyp alýǵa 3,5 mlrd. teńge qarastyrylyp otyr.
Qabyldanyp jatqan sharalardyń arqasynda elimizde álemdik talaptarǵa saı keletin zamanaýı kardıohırýrgııalyq qyzmet qurylýda.
