Qazaqstanda 2009/2010 jylǵy oqý jylynyń basynda 148 joǵary oqý ornynda 610,3 myń stýdent oqydy
ASTANA. Qańtardyń 10-y. QazAqparat /Ernur Aqanbaı/ - Qazaqstanda 2009/2010 jylǵy oqý jylynyń basynda stýdentteriniń jalpy sany 610,3 myń bolatyn 148 joǵary oqý orny jumys istedi,
dep habarlaıdy QazAqparat QR Statıstıka agenttigine silteme jasap.
Agenttiktiń málimetinshe, atalmysh joǵary oqý oryndarynyń 53-i memlekettik, olarda stýdentterdiń 321,7 myńy nemese 52 paıyzy oqýda. Genderlik turǵydan alǵanda stýdentterdiń 58,3 paıyzy qyz balalar jáne 41,7 paıyzy jasóspirimder. «131,9 myń adam memlekettik bilim granttarynyń esebinen bilim alýda, bul stýdentterdiń jalpy sanynyń 21,6 paıyzyn quraıdy. Al 9,9 myń adam (1,6 paıyz) memlekettik bilim tapsyrystary esebinen bilim alýda, 468,4 myń adam (76,8 paıyzy) aqyly negizde oqýda», delingen agenttiktiń búgingi habarlamasynda.
Agenttiktiń málimetinshe, stýdentterdiń 318,7 myńy nemese 52,2 paıyzy kúndizgi, 47,4 paıyzy syrttaı jáne 0,4 paıyzy keshki oqý bólimderinde bilim alýda. 303,7 myń stýdent memlekettik tilde oqýda. 2009/2010 jylǵy oqý jylynyń basynda respýblıkamyzdaǵy joǵary oqý oryndarynda 90-nan astam ulttyń ókilderi bilim alǵan. Bilim alýshylardyń úles salmaǵy jaıly aıtatyn bolsaq: 74,5 paıyzy - qazaqtar, 17,7 paıyzy - orystar, tatarlar, ózbekter, ýkraındar 1-1,4 paıyz shamasynda, 4,2 paıyzy basqa ulttar. Qarastyrylyp otyrǵan oqý jylynda 181,6 myń stýdent oqýǵa jáne daıyndyqa qabyldanǵan. Bul 2008/2009 jylǵy oqý jylymen salystyrǵanda 11,3 myńǵa nemese 6,7 paıyzǵa kóp. Atalmysh oqý jylynda 176 myń bilikti mamandar oqýlaryn bitirgen. Bitirýshilerdiń 4,8 paıyzy joǵary arnaıy bilim, 95,2 paıyzy bakalavrdyń akademııalyq dárejesin aldy. Agenttiktiń málimetinshe, respýblıkamyzdyń joǵary oqý oryndarynda oqyp jatqan stýdentterdiń 25,4 paıyzy áleýmettik bilim jáne ǵylym, 24 paıyzy pedagogıkalyq, 18 paıyzy tehnıkalyq ǵylym jáne tehnologııa mamandyqtary boıynsha bilim alýda. Joǵary oqý oryndarynyń shtatynda 39 myń 155 oqytýshy tur, 5 myń 937 oqytýshy qosa atqaryp jumys isteıdi. Professorlar-oqytýshylar quramynyń jalpy sanynyń 7,1 paıyzynyń ǵylym doktory, 33,7 paıyzynyń ǵylym kandıdaty ǵylymı dárejesi, 5,8 paıyzynyń professor ǵylymı ataǵy bar, 16,7 paıyzy dotsent.
