Qazaqstanda 200 jáne 400 metr qashyqtyqqa júgirýden aldyma jan salmaımyn — sýrdo atlet
AQTÓBE. KAZINFORM — Danııl Şelokov — Qazaqstannyń birneshe dúrkin chempıony, Azııa-Tynyq muhıty chempıonatynyń altyn medal ıegeri. Kazinform tilshisi Sýrdlımpıada oıyndarynyń úzdigi atanýǵa bar kúshin salyp júrgen sportshymen kezdesti.
Aqtóbe oblysy Muǵaljar aýdany Qandyaǵash qalasynyń týmasy Danııl Şelokov búginde bar ýaqytyn sportqa arnaǵan jan. Ol jyl boıy jattyǵý jumystaryn júrgizedi. Júgirý densaýlyq kepili ǵana emes, el men jerdi tanytýǵa, kásibı sportshy atanýyna múmkindik bergen sport túri dep biledi.
— Men Aqtóbe qalasyna 2006 jyly keldim. Mektepte bilim alyp, sportpen shuǵyldandym. Jattyqtyrýshym Álı Kýstanov jeńil atletıkaǵa baǵyttap, tynysymdy asha tústi. Sodan beri jattyǵýdan qol úzgen emespin. Aqtóbe oblystyq arnaıy mektebinde júrgende, ıaǵnı, 14 jasymnan bastap osy baǵytty damytyp kelemin. Maǵan dál osy sport túri unaıdy. Búginde jetken jetistigim az emes. Birneshe dúrkin el chempıony atandym. 2023 jyly Iranda ótken Azııa oıyndaryna qatysyp, ІІ oryn ıelendim. 2024 jyly Malaızııada Azııa-Tynyq muhıty chempıonaty ótip, І, ІІ jáne ІІІ orynnan kórindim, ıaǵnı toptyq estafetada І orynda ıelenip, qyzdar men erler arasyndaǵy estafeta kezinde ІІ orynnan kórindim. Ózim 400 metr qashyqtyqqa júgirip, úshinshi bolyp keldim. Japonııadaǵy Sýrdlımpıada oıyndaryna barǵanymmen jaraqat alyp, jarysqa qatyspadym. Al Taıvanda ótken álem chempıonatynda 9-oryndy ıelendim, — dedi Danııl Şelokov.
Jeńil atlet qazirgi kezde Almaty qalasynda ótetin spartakıadaǵa daıyndalyp júr. Úzdikteri Azııa oıyndaryna joldama alady.
— Ózim 200, 400 metr qashyqtyqqa júgiremin jáne estafetaǵa qatysamyn. Aptasyna 3-4 kún 2-3 saǵattan daıyndalamyn. Jattyǵý Olımpıada rezervin daıarlaý ortalyǵynda jáne «Qýat» sport kesheninde ótedi. Sport kesheninde eden taqtaı bolǵan soń syrǵyp turady. Ol jer jeńil atletterge yńǵaısyz. Kún jyly bolsa Olımpıada rezervin daıarlaý ortalyǵyndaǵy júgirý alańyna kelemin. Kún salqyn kezde keshen ishinde jattyǵamyz. Negizi jeńil atletıka sportshylary úshin jabyq manej kerek. Sol kezde úzdik nátıjege qol jetkizýge bolady. Al qazirgi kezde qysta jıi demalys bolady. Sonymen birge arnaıy jattyǵý zaly da qajet. Ázirge shaǵyn ǵana jattyǵý zalynda shynyǵamyz. Halyqarylyq jarystarda úzdik nátıjege qol jetkizýge osy ekeýi kedergi bolyp tur. Eresekter men jastar arasynda qazir 15 shaqty sportshy bar, — dedi ol.
Birizdilik bolmaǵan soń sportshynyń qaıta qalypqa kelýi, jyldamdyqty arttyrýy qıynǵa túsip tur. Al onyń armany — Sýrdlımpıada chempıony ataný.
— 2029 jyly Grekııada Sýrdlımpıada oıyndary ótedi. Sol jarysqa qatysyp, júldege ıe bolsam deımin. Ózim Qazaqstan quramasynyń múshesimin. Biz kóbine Almaty qalasynda jattyǵamyz. Keıde Bishkekke baramyz. Quramanyń bas bapkeri Óskemen jáne Almaty qalalarynda. Qazirgi kezde Qazaqstan boıynsha úzdik nátıje kórsetip júrmin. 200, 400 metr qashyqtyqqa júgirýden aldyma jan salmaımyn, básekeles bolar eshkim joq. Álem boıynsha Japonııa, Polsha, Kolýmbııa, Shvetsııa, Ońtústik Koreıada myqty sporshylar bar, — dedi ol.
Ol sheteldikterdi ǵana óz básekelesi sanaıdy. Danııl Şelokov qazirgi kezde 200 metrdi 22.50 sek, 400 metrdi 49.60 sekýndta eńserip júr. Sportshy 200 metrdi 21sekýndta, al 400 metrdi 47 sekýndta júrigip ótýdi josparlap qoıǵan. Bul Sýrdlımpıada jeńimpazdarynyń kórsetkishi.
Aıta keteıik, Danııl Şelokov Aqtóbe oblystyq arnaıy mektebin bitirgen soń kolledjge oqýǵa tústi. Mamandyǵy — dene tárbıesi páni muǵalimi. Bolashaqta jattyqtyrýshy bolýy da múmkin. Kásibı maman osy baǵytty tańdaǵan izbasarlaryna birneshe keńes te berdi. Sportshy júgirmes buryn aldymen tehnıkany meńgerýi tıis. Jattyǵýǵa asa úlken jaýapkershilikpen qarap, ózine saı básekeles tabýy kerek. Bul sportshyny shyńdaı túsedi. Júgiretin adam bulshyq etti shymyr etý úshin túrli dene jattyǵýyn da jasaıdy. Ár sportshynyń baǵytyna saı jeke jattyǵý tańdalady.
— Jattyǵý jolaǵy álemniń bárinde birdeı. Tek shetelge shyqqanda ol jaqtyń aýasy ózge bolady. Jeńil atletke onyń da áseri bar. Bastysy jaraqat alyp qalmaý kerek. Jaraqat alsa birneshe aı em qabyldaýǵa týra keledi. Máselen ózim byltyr qazan aıynda jaraqat alyp, alty aıdan keıin ǵana qalpyma keldim. Jattyǵýdy birden bastaýǵa bolmaıdy. Óńirde men sekildi Qýanysh, Qazbek, Erlan esimdi sportshylar bar. Biz bir-birimizben básekege túse alamyz, — dedi ol.
Danııl Şelokovtyń ata-anasy Qandyaǵash qalasynda turady. Otbasynda tórt balanyń eń úlkeni jáne ózi ǵana kásibı sportpen shuǵyldanady.
Aıta keteıik, sáýir aıynda Astanada sýrdo fýtzaldan úzdikter anyqtalǵanyn jazǵan edik.
