Qazaqstanda 200 volonterlik uıym jumys isteıdi

NUR-SULTAN. QazAqparat – Qazaqstanda 200 volonterlik uıym jumys isteıdi. Bul týraly volonterlerdiń «BIRGEMIZ» respýblıkalyq front-keńsesin resmı iske qosý sharasynda QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Volonter jyly aıasynda birqatar aýqymdy jobany júzege asyrý kózdelýde. Osy rette búgin ashylyp otyrǵan front-keńse elimizdegi volenterlik qyzmetti jańa deńgeıge kóteredi dep senemin. Buǵan qosa, qurmetti Qasym-Jomart Kemeluly, ózińiz bastama qylyp kótergen qaıyrymdy ister jylyn joǵary deńgeıde uıymdastyrýda front-keńse bar kúsh-jigerin jumsaıdy», - dedi Dáýren Abaev saltanatty sharaǵa arnaıy qatysqan Memleket basshysy Qasym-Jomart Toqaevqa qarata aıtqan sózinde.

Mınıstrdiń dereginshe, búginde elimizde 50 myń belsendi azamaty bar 200 volonterlik uıym jumys isteıdi.

«Máselen, Siz bastama jasaǵan «Taza Qazaqstan» aktsııasyna 300 myń adam qatysty. Osy jyly bul aktsııany jalǵastyramyz. Menińshe, qatysýshylar sany mıllıon adamǵa jetip qalýy tıis. Bıyl Qazaqstan dúnıejúzilik aktsııanyń qatysýshysy bolady. Ózińizde jaqsy biletin jaqsy mysaldarymyz da bar. Ol – Arys. Sol kezde eriktiler, onyń ishinde júzdegen jas Arysty qalpyna keltirýge qatysty», - dedi ol.

Onyń atap ótýinshe, búginde qazaqstandyqtardyń tek 6 paıyzy ǵana volonterlikpen belsendi aınalysady. Degenmen, volonterlik sharalarǵa qatysýǵa nıetti qazaqstandyqtardyń sany 48 paıyzǵa jýyqtaıdy.