Qazaqstanda 200 myń adam onkologııalyq esepte tur - depýtat

ASTANA. QazAqparat - Elimizde jyl saıyn 35 myńnan astam adam qaterli isikke shaldyǵyp, 14 myńnan astam adam kóz jumady, 200 myń qazaqstandyq esepte tur. Bul derekterdi depýtat Dınara Naýmova Májilis otyrysy barysynda aıtty, dep habarlaıdy QazAqparat.

Depýtat onkologııalyq aýrýlardy emdeý men dıagnostıkalaýdy uıymdastyrý tásilderin dereý qaıta qaraý qajet dep sanaıdy.

«Biz onkologııalyq naýqastardyń quqyqtaryn qorǵap, olardyń sapaly ári ýaqtyly emdelýine kepildik berýimiz kerek. Meni onkologııalyq naýqastarǵa múgedektik taǵaıyndaý protsesi alańdatady. Statıstıkalyq málimetterge súıensek, elimizde 40 myńnan astam onkologııalyq aýrýǵa shaldyqqan naýqas bolsa, onyń tek 16 myńy (40%) ǵana merzimsiz múgedektikke ıe. Qalǵan qaterli isikke shaldyqqandar jyl saıyn múgedektigin dáleldeýge májbúr, bul turǵyndar arasynda úlken narazylyq týǵyzýda. Keıbir bıznes-protsester men emdeý hattamalaryn jeńildetý, tipti joıý úshin múgedektik týraly zańnamany qaıta qaraý kerek», - Dınara Naýmova Premer-Mınıstrdiń atyna joldaǵan saýalynda.

Ol emdeý hattamalaryndaǵy sońǵy ózgeristerge baılanysty patsıentter hımıoterapııa alǵan saıyn synaqtan ótýi kerektigin eske saldy.

«Bul patsıentter úshin qosymsha stress týdyrady jáne olardyń densaýlyǵyna teris áser etýi múmkin. Bul protsedýrany mınımýmǵa deıin azaıtý múmkindigin qarastyrý qajet», - dedi Májilis depýtaty.