Qazaqstanda 200 myńnan astam sheteldik balaǵa MÁMS júıesinde tirkeý mártebesi berilgen
ASTANA. KAZINFORM — Shetel azamattarynyń 200 myńnan astam balasyna MÁMS júıesi aıasynda avtomatty túrde saqtandyrylǵan degen mártebe berildi. Olarǵa 2020–2025 jyldar aralyǵynda medıtsınalyq kómek kórsetý shyǵyndary 3,6 mlrd teńgeni qurady. Bul týraly Quryltaıdaǵy Áleýmettik-mádenı damý komıtetinde MÁMS júıesin damytý boıynsha taqyryptyq otyrysta málim boldy.
— 2020–2025 jyldar aralyǵyndaǵy derekterdi taldaý nátıjesinde, shetel azamattarynyń 200 myńnan astam balasyna qatysty turaqty turý deregi tekserilmesten, avtomatty túrde saqtandyrý mártebesi berilgeni anyqtaldy. Olarǵa medıtsınalyq kómek kórsetý shyǵyndary 3,6 mlrd teńgeni qurady, — dedi «Áleýmettik medıtsınalyq saqtandyrý qory» KAQ basqarmasynyń tóraǵasy Gúlmıra Sábdenbek.
Onyń aıtýynsha, 75 myń shetel azamaty bıýdjettik jeńildikpen kómek alǵan, al olarǵa jumsalǵan qarajat 4,3 mlrd teńge boldy. Sonyń arasynda 27 myń adam dıspanserlik esepte tursa, taǵy 902 patsıent narkologııa jáne psıhonevrologııa salalary boıynsha em alý úshin tirkelgen. Buǵan qatysty barlyq shyǵyndar tolyǵymen Qazaqstan tarapynan ótelgen.
— Bul jaǵdaılardyń barlyǵy quqyqtyq turǵydan tekserilýi tıis. Aıta keteıik, qazirgi ýaqytta jeńildikter alýǵa quqyly adamdar sanattary olardyń naqty qajettilikteri, qarjylyq múmkindikteri nemese medıtsınalyq táýekelderi tıisinshe baǵalanbastan aıqyndalady. Bizdińshe, jeńildik alatyn osy sanattar úshin halyqaralyq standarttarǵa negizdelgen biryńǵaı ólshemsharttar belgilenýi qajet, — dep atap ótti Qor basshysy.
Buǵan deıin habarlanǵandaı, QR Densaýlyq saqtaý birinshi vıtse-mınısti Tımýr Sultanǵazıev eldegi perzenthanalar kredıtorlyq qaryzdy tolyq ótegenin aıtty.