Qazaqstanda 200-den astam jalǵan sertıfıkatpen taýar óndirýshiler anyqtaldy

ASTANA. KAZINFORM – Májilis depýtaty Muqash Eskendirovtiń aıtýynsha, jalǵan sertıfıkattardy paıdalanǵan 200-den astam kompanııa memlekettik satyp alýǵa qatysqan.

— Búgin «Atameken» kásipkerler palatasynyń ókili habarlaǵandaı, 6 jyldyń ishinde 70 myńǵa jýyq CT-KZ sertıfıkaty jáne 1,5 myńǵa jýyq ındýstrııalyq sertıfıkat berildi. Alaıda, Prokýratýra organdary 200-den astam sertıfıkattyń sáıkes kelmeıtindigin anyqtady. Shyn máninde, jalǵan sertıfıkattardyń sany kóp bolýy múmkin, — dedi Muqash Eskendirov Májilis otyrysynan keıin ótken baspasóz máslıhatynda. 

Halyq qalaýlysynyń aıtýynsha, jalǵan sertıfıkattardy paıdalaný keıbir kompanııalardyń zańsyz memlekettik satyp alýǵa qatysýyna múmkindik berip otyr. 

— Memlekettik satyp alýǵa qatysýdyń mindetti sharttarynyń biri kásiporynnyń otandyq taýardy shyǵarý. Alaıda, keıbir kompanııalar jalǵan sertıfıkatpen memlekettik satyp alýǵa qol jetkizdi, — deıdi depýtat.

Aıta keteıik, búgin Májilis otandyq taýar óndirýshilerdiń tizilimi týraly zań jobasyn birinshi oqylymda maquldady.