Qazaqstanda 200-den astam sheteldik tin jasýshalaryn qoldaný arqyly em aldy
ASTANA. QazAqparat - Qazaqstanda 200-den astam sheteldik tin jasýshalaryn qoldaný arqyly em aldy. Bul týraly búgin Úkimet otyrysynda «Ulttyq ǵylymı medıtsınalyq ortalyq» AQ basshysy Abaı Baıgenjın málim etti, dep habarlaıdy QazAqparat.
Onyń eske salyp ótkenindeı, 7-8 jyl buryn Memleket basshysynyń tapsyrmasymen Astanada medıtsınalyq klaster qurylǵan bolatyn. Abaı Baıgenjınniń sózine qaraǵanda, osynyń arqasynda Qazaqstanda alǵash ret adam múshesin aýystyrý jáne tin almastyrý operatsııalary sátti qoldanylýda. Sońǵy úsh jylda elimizde búırek, baýyr, júrek, ókpe jáne julyndy aýystyrý boıynsha myńnan astam ota jasaldy.
«Jaqynda ǵana Ulttyq kardıohırýrgııalyq ortalyq mamandary «júrek-ókpe» almastyrý boıynsha keshendi operatsııany sátti jasap shyqty», - dep atap ótti ol.
Sonymen qatar Abaı Baıgenjın 2003 jyldan beri qalpyna keltirý medıtsınasynyń biregeı salasy - jasýsha almastyrý oń nátıjeler berip jatqandyǵyn habarlady. Onyń málimetteri boıynsha, osy jyldar aralyǵynda baýyr tsırrozy, qant dıabeti, júıke júıesi, skleroz aýrýynyń aýyr formalaryna dýshar bolǵan 6 myń patsıent sátti emdelip shyqqan. Altsgeımer, Parkınson jáne ózge de aýrýlardy emdeýde oń nátıjelerge qol jetkizildi.
«2010 men 2016 jyldar aralyǵynda AQSh, Qytaı, Kýveıt, Úndistan, BAÁ, Saýd Arabııasy, Reseı, Sıngapýr elderinen 200-den astam shetel azamaty tin jasýshalarymen qoldaný arqyly nátıjeli em-dom qabyldady», - dep túıdi oıyn A. Baıgenjın.
