Qazaqstanda 200-den astam lıfti tekserildi

ALMATY. QazAqparat - Qazaqstanda memlekettik baǵdarlamamen salynǵan turǵyn úılerdiń 200-den astam jedel satysynyń sapasy tekseristen ótkizildi, dep habarlaıdy QazAqparat tilshisi.

Qazaqstan lıftshiler ulttyq qaýymdastyǵy men «Qazaqstan ıpoteka kompanııasy» AQ-nyń basshylary ózara yntymaqtastyq týraly memorandýmǵa qol qoıdy. Bul qujatta «Nurly jer» memlekettik baǵdarlamasy boıynsha turǵyzylǵan turǵyn úılerdin jedel satylaryna qyzmet kórsetý týraly jazylǵan.

Kelisimshart jasalmas buryn, eki tarap elimizdiń 20 qalasyndaǵy turǵyn úılerdiń 200 lıftisin tekserdi. Keıbir aqaýy bar lıftiler qysqa merzimde jóndeldi.

«Aldaǵy ýaqytta lıftini paıdalanýǵa beretin jumysty bir júıe boıynsha atqaramyz dep otyrmyz. «QIK» AQ «Nurly jer» baǵdarlamasy boıynsha Qazaqstanda 1 mln sharshy metrden astam úıdi nemese 326 turǵyn úıdi paıdalanýǵa berdi. Bul nysandarda 50 myńnan astam adam turyp jatyr. Bizdiń basty maqsatymyz - osy turǵyndardyń tynyshtyǵy men jaıly ómir súrýine qolaıly jaǵdaı jasaý. Bizdiń osy memorandým elimizdegi lıft qyzmetiniń salasyn damytyp, ary qaraı arttyrýǵa óz septigin tıgizedi», - dedi «Qazaqstandyq ıpoteka kompanııasy» AQ basshysynyń orynbasary Aısultan Akchýrın.

Sonymen qatar, bul kelisimshart aıasynda Qazaqstan lıftshiler ulttyq qaýymdastyǵynyń ókilderi jedelsatylardy árdaıym tekseristen ótkizip, sondaı-aq olardyń tehnıkalyq jaǵdaıyn baıandap otyrady.

Avtor: Elaman Turysbekov