Qazaqstanda 200-den astam Keńes Odaǵynyń Batyry týraly tyń derekter tabyldy
«Qazaqstandyqtar - Keńes Odaǵynyń Batyrlary» beıneantologııasyn «Ardagerlerdi ardaqtaıyq!» jobasy sheńberinde ERG Eýrazııalyq toby, QR kınoqujattar men dybys jazbalary ortalyq memlekettik muraǵaty jáne «Nur Otan» partııasy shyǵardy. Aıta keteıik, beıneatologııa uzaqtyǵy 8-10 mınýttyq qazaq jáne orys tilderindegi qysqametrajdy 70 derekti fılmderden turady. Olar «Astana» telearnasynda 6 mamyrdan beri ekranǵa shyǵarylýda.
Fılmderdi daıyndaý barysynda Qazaqstandyqtar - Keńes Odaǵy Batyrlarynyń jeke isteri saraptalyp, olardyń derekteri jetekshi tarıhshylarmen tekserildi. Búgingi kúnge deıin Qazaqstannan shyqqan 611 Keńes Odaǵynyń Batyry jaıly aqparat bekitilgen.
Sondaı-aq beıneantologııada Uly Otan soǵysy kezindegi qazaq oryndaýshylarynyń mýzykalyq shyǵarmalary jurtshylyqqa pash etildi.
«Búgin biz 70 serııaly «Qazaqstandyqtar - Keńes Odaǵynyń Batyrlary» beıneantologııasynyń kórsetilimin ótkizip jatyrmyz. Biz búgin barlyq serııalardy kórsete almaıtynymyz anyq, sondyqtan eń negizgi degen tórt serııany ardagerlerge usynamyz. Olar: «Soǵys oty» , 28 panfılovshylar, Rahym Qoshqarbaev pen tyl eńbekkerleri jaıyndaǵy serııalar. Jalpy beıneantologııa Keńes Odaǵynyń Batyry ataǵyna ıe bolǵan 600-den astam Qazaqstan týmalary týraly baıan etedi», - dep atap ótti «Nur Otan» partııasynyń ıdeologııa boıynsha hatshysy Farhad Qýanǵanov.
Onyń aıtýynsha, partııa kúshimen júrgizilgen zertteý jumystary barysynda qazaqstandyqtarǵa beımálim tyń derekter tabylǵan.
«Eger UOS 70 jyldyǵyna deıin bizge tek Keńes Odaǵy Batyry ataǵyn alǵan 400 qazaqstandyq týraly belgili bolsa, búginde ol tizim 611-ge jetti. Taǵy 23 Batyrdyń málimetteri óńdelýde. Bul - óte úlken jumys boldy. Osyndaı aýqymdy jumys sońǵy ret 1968-69 jyldary atqarylǵan kórinedi», - deıdi partııa hatshysy.
F. Qýanǵanovtyń sózi boıynsha, KSRO Batyry ataǵynyń ıegerleri týraly eki tomdyq kitap jaryqqa shyqpaq. Bul jumystar aldaǵy jyldary da jalǵasyn tabady.
