Qazaqstanda 200-den asa úndistandyq kompanııa jumys isteıdi
ASTANA. QazAqparat - Atyraý oblysynyń ákimi Nurlan Noǵaev Úndistan Respýblıkasynyń Qazaqstandaǵy Tótenshe jáne ókiletti elshisi Prabhat Kýmarmen kezdesti, dep habarlaıdy óńirlik ákimdiktiń baspasóz qyzmeti.
«Búgingi kúni Atyraý oblysynyń Úndistanmen taýar aınalymy 547 mln dollardy quraıdy. Óńirde úndistandyq kapıtaldyń qatysýymen 20 kompanııa jumys jasaıdy. Qazaqstan Prezıdenti Nursultan Nazarbaev el ekonomıkasynyń barlyq salalaryna ınvestıtsııalar tartýǵa úlken kóńil bólýde. Osy faktordy eskere otyryp, bizde sheteldik ınvestorlardyń kapıtal salýyn ulǵaıtý úshin barlyq múmkindikter bar», - dedi Nurlan Noǵaev.
Oblys ákimi ınvestorlardyń óńirdiń qolaıly ınvestıtsııalyq ahýalyna nazar aýdaratynyn jáne jergilikti atqarýshy organdar kompanııalarǵa birlesken óndiristerdi damytý úshin meılinshe qolaıly jaǵdaılar jasaýǵa daıyn ekenin atap kórsetti.
Óz kezeginde Úndistan Respýblıkasynyń Qazaqstandaǵy Tótenshe jáne ókiletti elshisi Atyraýǵa kelerdiń aldynda Almaty men Shymkentte bolǵanyn aıtyp ótti.
«Meniń mindetim eki eldiń arasyndaǵy qolaıly qarym-qatynasty damytý. Ekonomıkalyq yntymaqtastyqtyń da mańyzy zor. Qazaqstanda bizdiń elimizdiń bıznesiniń qatysýymen 200-den asa kompanııa jumys jasaıdy. Bizdiń saparymyzdyń baǵdarlamasyna qazaqstandyq taraptyń da, úndistandyq taraptyń da áleýetti ınvestorlarymen kezdesý engizilgen», - dep atap ótti Prabhat Kýmar.
