Qazaqstanda 20 myń medıtsına qyzmetkeri koronavırýsqa testten ótti

NUR-SULTAN. QazAqparat – Qazaqstanda 20 myń medıtsına qyzmetkeri COVID-19 indetine testten ótti. Bul týraly QR Aqparat jáne qoǵamdyq damý mınıstri Dáýren Abaev málim etti, dep habarlaıdy QazAqparat tilshisi.

«Búgin Tótenshe jaǵdaı rejımin qamtamasyz etý jónindegi memlekettik komıssııanyń otyrysy ótti. Kún tártibindegi másele – Prezıdenttiń tapsyrmalaryn oryndaý. Basty mindetterdiń biri – test arqyly anyqtaý jumystarynyń kólemin arttyrý. Osy rette aıta keterligi, sáýir aıynda anyqtalǵan indet jaǵdaılarynyń 67 paıyzy sımptomsyz bolǵan. Bul aldyn alý dıagnostıkasynyń arqasynda anyqtaldy», - dedi Dáýren Abaev «Habar 24» arnasyndaǵy onlaın baspasóz máslıhatynda.

Mınıstr álemdik tájirıbe kórsetkendeı medıtsına qyzmetkerlerin test arqyly tekserip otyrý óte mańyzdy ekenin atap ótti.

«Sol úshin elimizde 20 myńnan asa medıtsına qyzmetkeri test arqyly tekserildi», - dedi ol.